Lidioom: Griep prikke det kan neet

Oktober is de wienmaondj, den de wien waert dan geougs, loos ich. Brrr, dach ich de aafgeloupe daag. Me kan allewiel baeter sjpraeke van de maondj van de griepprik. Dao waert hiel get euver gesjreve. Oos gezet zag: ‘Vorig jaar hebben meer mensen de griepprik gehaald dan het jaar ervoor’, en efkes wiejer: ‘Hij ligt (…) voor ongeveer 6 miljoen mensen gratis klaar bij de huisarts.’

Griepprik, gek waord. Eine prik dae örges klaor ligk, en dae me (aaf?) kan haole. Veer kalde van griepsjpuit. Ach, ich kiek neet mie zoe nej, wen me ‘griep’ mae neet oet-prik mit ein zaachte G.

Ich wil ’t lever euver prikke zelf höbbe. Det kóste veer neet es inente. ’t Waordebook van Zjwame haet peke: ze peekde häöm mit ein naolj. Op oze korsboum sjteit eine peek, geine piek. Eine trui dae kós dich sjtaeke, neet prikke. Ouch netele sjtaeke – prikke liek mich hiej ei kleuterwaord.

Teminste: in dees beteikenis. In ‘t WNT (Woordenboek der Nederlandsche Taal) sjtaon waal teen beteikenisse van prikke, die ammaol get mit ‘sjtaeke’ vandoon höbbe, mit puntjige dinger. Oos waord prikke zeen ich d’r neet biej: (op)vange; beveurbeeldj eine bal prikke. Opvange: me kan gein vleeg prikke, waal, zuug: ich kós mich nag sjuus prikke, angers woor ich hel gevalle. Op­van­ge kan me de naober wen dem de vrouw voert is, zoe wie de kaerel dae heim droetgebónzjoerd is: dao kan prikke neet. Eine vlöchteling prikke kan allein wen dae bezig is te valle…

In de waordebeuk van Valkeberg en Ech vinjt me ein twiede beteikenis: iets heimelijk weg­nemen; dao mót zich eine det geldj oet de laaj geprik höbbe – Ingels to prig: gappe, jatte. Det prikke liek waal hiel väöl op pikke, en alles waert nag óndudelikker biej ’t waord (was)piks­ke (Helje): det prik (AN, veer zegke sjtik) bókse aan de lievesdraod. Ich höb ’t naogevraog, ze zagte: wo zien de pikskes.

Allei, euver de Ingelse wäörd prick en pig zólle v’r ’t lever neet höbbe; volgende waek daoveur euver woveur dae ich hiejbaove biejnao gevalle woor.

Reagere? Sjrief nao redactie@veldeke.net

 

Lidioom is de wekelekse rubriek euver ‘t eigene vaan eus Limburgse taol. Dit is al weer aoflievering 51. Alle veurege aoflieveringe zien trök te vinde in eus arsjief.