Lidioom: Hamel mit paeperplek

Euver plak en zien breurs of de naeve plek, vlek en vlak zól me ei beukske vól kónne sjrieve, suggereerde ich vurge waek. Ich weit neet of ich nao mien aanwirk wiejer mót gaon. Ich dink det ich al genóg gezag höb euver die wäörd. Toch nag get?

Allei dan. Ein Hollesje vlek is in ’t Limburgs dök ein plek. Det plek aevel haet ’t AN ouch; de v. Dale zaet hiejeuver: klein gedeelte van de oppervlakte van iets dat anders van kleur of uiterlijk is dan de oppervlakte eromheen. Ein blauw plek beveurbeeldj. Mae ’t waord  moedervlek vólduit ouch aan de umsjrieving hiejbaove. Vräögske: woveur dan neet *moederplek? Kan det de vreuger plaats van moder zien (aan d’n aanrek)?

Anger vraog: mótte veer noe van moderplek gaon kalle? Det klink mich get vertaals. Ich höb ein anger waord gezóch, en keem oet biej paeperplek. Besjteit (nag) neet – waal peperkoos, op ’t Belsj zaet me mich. Beteikenis: huidvlekje. Det -koos kump mesjiens van ‘korrel’, hiel vreuger coorn. Laot zitte: paeperplek is bes broekbaar veur die broen dinger op mien henj. Neet te verwórre mit sjprotele.

Ich höb weer ei nuuj waord gemaak: waat mein ich mich waal. Wo bön ich noe mit doonde. Oos Taal get henjiger make? Nae: neum ’t kuite (stoeien, spelen). Sjpele? Loer: eine jóng dae zien Limburgs wilt laote klinke sjrief euver ein prachtige paeperplek op de rechter jaowaal van zien nuuj vlam. Um te pune zoe sjiek. Begriep det jederein? Ach, ’t is gesjreve…

Ein nuuj vraog: waat wil ich mit die verzónne wäörd. Antjwaord: ich zeen die es grei, materiaal veur zkv’tjes inein te tummere. Ei nuuj waord kan eine nagel zien dae ein anger waord op de juuste plaats hilt. Ich mót allein zörge det ich gein pitstang of Ingelse sjleutel gaef biej dae nagel plaats einen hamel (die L sjteit in de waordebeuk van Remunj en Zjwame: gooj beuk). Vraoge vraoge. Bön ich waal dudelik? Ich wil neet altied dudelik zien. Volgende waek woveur…

Dit is alweer aoflievering 28 vaan de rubriek Lidioom. Al de veurege aoflieveringe kint geer trökvinde in eus arsjief.

 

 

← Ga terug