Lidioom: Hoesweuning

’t Guf waeke det ich teen maol druim. Druime? Nou ja: dan bön ich mit get doonde det ich neet zelf verzónne höb. Jaomer genóg zien 39 van de veertig druime neet waat me allewiel leuk! neump.

Dees waek hauw ich waal weer eine gojen druim. Ich woor in ’t Hoes van ’t Limburgs in Remunj, en zoog dao alle kamers behange mit Lidiooms. Hiel groot ’t prachtige vignet (vinjet?) van Bèr Brounts, wie einen hiemelsen herfsbós, en daotösse es gevalle blaer sjtökker oet mien sjtökskes.

Ja, det zól get zien, ein (eige) Hoes van ’t Limburgs, krek wie me in Drente ’t Huus van de Taol haet. Wikipedia zaet: ‘t Huus van de Taol is een op 1 meert 2007 op-erichte organisaosie veur ‘t anfietern van de Drèentse taal. Sjiek waord det anfietern, en jederein begriep det waal – oet de kónteks. Mae wie te verklaore? Allei: helop druime haet min zin. En op ’t Malieveldj höbbe v’r nieks te zeuke.

Daoveur wil ich ’t euver ’t waord ‘hoes’ höbbe. Waat kan me dao nag euver vertelle. Geweun waord. Zuug aevel deze riedel: Haus (Aoke, mae neet Kirchroa, woveur höbbe die oos hoes?), hoes dus, huus (N.Limburg, Nedersaksisch), huis en house. Gans geweun mae wen veer ein HOES van ’t Limburgs kriege, zal me det baove de A67 waal pikke? (Det ‘pikke’ vinj ich ei good brónsgreun waord, den de hoonder biej ós pikde al wie in Amsterdam… Zjuus: dao woor gein hoon te zeen).

Zólle v’r daoveur ein anger waord veur dét ‘Hoes’ zeuke? Nae, ’t geit zich neet um ein geboew mae mier ein insjtituut, of organisatie. Angers gezag: dit saort hoezer zien gein weuninge. Ein weuning is ei geboew wo me in kan/mót hoeze. Ich dink det dit hoeze puur Limburgs is, den ich zeen ‘huizen’ in dees beteikenis zelje of noets.

Hoeze in ein vazel hoes, krot of petik neum ich meis hoezjere. Ouch (vreuger) mit einen angere kaerel samewone. In ein idiomaticum van ’t Limburgs kan hiej boezjere biej kómme. Wie? Volgende waek nag mier hoeswirk…

Reagere? Sjrief nao: redactie@veldeke.net

 

Lidioom is eus wekelekse rubriek euver ‘t eigene vaan de Limburgse Taol. Dit is aoflievering 55. Alle veurege aoflieveringe zien trök te vinde in eus arsjief.

 

 

← Ga terug