Lidioom is jäöreg!

Lidioom is jäörig. Mörge ei jaor geleje versjeen de ierste aaflevering. En noe al trökkieke? Det neet: ich wil nag zoeväöl en veuroet. Ich höb waal get door det jaor geblaajd. Gezeen: ich mót mich ware (oppasse veur) neet mit meininge te kómme die bao nieks mit de taal zelf vandoon höbbe. Oos dök belachelik gemaakde zaachte G heurt neet biej Lidioom.  En de gezet aafzeike, de gezet die dök luug euver Oos Taal, zeker neet. Ich kan baeter mit ein nuuj rubriek beginne.

Euver ’t waord swipeten det dit weekend op de veurpagina van de biejlaag (van oos gezet) Leef! sjting, laot ich uch zelf naodinke. Ich wil neet shinen mit gekke wäörd veur zjweefvlege, wie gevlekt roetneusje. Die höb ich allein gebroek es veurbeeldj van nuuj gemaakde wäörd.

Gemaak – neet óntsjtange of euvergenaome wie mail. Me neump nuuj wäörd waal neologisme(n). Ich höb veural belangsjtelling veur nuuj wäörd die de taal verrieke, sjieker of baeter make. Wäörd neet veur de weitesjap mae veur de sjpas, plezeer mit Oos Taal, die Lust am Text.

Ziewaegske nag. Sjrievers, veural dichters, höbbe dök hiel opvallende wäörd gemaak, noer veur de sjiek. Me neump det waal echte neologisme. Ze heure biej de taal, mae kómme neet maekelik in de waordebeuk, wiel ze zelje euvergenaome waere door taalgebroekers.

Nuuj gereidsjap, mesjiender, oetvinjinge, ideje, modes höbbe meis al eine naam veur ze hiej zien; dink aan de computer.  Dök wólle luuj einen eige naam veur get vraems. Wentelwiek aevel verloor mit 10-1 van ‘helicopter’, de kiekbuus woor get kienjerechtig. Ich höb dökker ’t waord sjpikkeleeriezer gesjik gekrege, es ‘prachtig waord’ veur eine bril. ‘t Waord ‘bril’ woor get te Hollesj, vónje die leefhöbbers van Oos Taal. Jaomer: nemes haet get gezeen in det kunswaord. En woveur zól ‘bril’ gein Limburgs zien? ’t Haet dudelik sjleiptoon. Zegk helop: ich ril van dae bril…

Ei gesjlaag veurbeeldj van ei nuuj zaakwaord vinj ich sjtoekdraod veur schrikdraad (zegke ze in Helje): me krieg waal ei sjtükske, mae hoof dao neet van te sjrikke.

Reagere? Sjrief nao: redactie@veldeke.net

 

Lidioom, eus rubriek euver ‘t eigene vaan de LImburgse taol,  besteit perceis ei jaor. 45 Aoflieveringe zien in die 12 maond op deze website gepubliceerd. Mèt daank aon Wim Kuipers, dee mèt iezere discipline eder week zie stökske aonlievert. Alle veurege aoflieveringe kint geer trök leze in eus arsjief.