Lidioom: Jeans mit behoof
De vurge waek bön ich weer mit ei nuuj waord aan kómme Lidiome. Woveur doon ich det? Daobiej: nuuj wäörd kónne gaaroet gein (L)idioom zien wen ze de ierste keer versjiene. Klop. Klop ammaol. Obbernuuj daoveur de vraog: woveur maak ich nuuj wäörd. Geweun: veur de gekke jen, zegke ze in Remunj. Ich dink det det dudelik is. ’t Waord ‘gekke’ zaet genóg. ‘t Sjteit ouch in ’t waordebook van Thoear. Beteikenis: grap. Dan liek gekke jen ei bietje döbbelop. Zól det jen van ‘jenne’ kómme? Kan good. Mae ’t Limburgs Etymologisch Woordenboek zaet mich det jen ein trut is, truttige vrouw, boerin. Sjeldjwaord: de verbastering van de veurnaam Johanna. Wie woveur? Ouch ’t waordebook van Zitterd haet Jen: Jeanet of Jannetje. Vraog: is Jannetje noe gek of ein boerin?
Zoe kan ich wiejer gaon. Geine behoof aan? Behoof? Sjteit zoe in ’t waordebook van Valkeberg. Hoof nemes euver te naeme. Nemes hoof sjtökskes in ’t Limburgs te sjrieve. Det behoof woor veur mich waal ei nuuj waord. Ich dink veur doezjende anger Limburgers ouch. Lidioom dus. Lidioom? Woveur dan? Ich vinj det ei bezunjer waord – amen.
’t Guf hóngerde van die wäörd. Wäörd die (bao) vergaete zien. Wäörd oet ein mislökde buut. Örges ligke ze te dinke aan d’n tied det ze waal mit meugde doon. Moog nag, wen ze zich aanpasse. Klump en euveral oetdoon, jeans aan. Zjuus: gekke jeans. Efkes nag: veur de gekke jen is Lidioom, ‘gekke jeans’ zeker neet.
Nag gauw veur de Paose: waar wil ich? Ierlik gezag: Oos Taal (weer) aansjtaekelik make. En taal: dao bedoel ich TAAL mit. Neet wie me wäörd oetsjprik (det gezeiks euver de zaachte G), wie me lestige wäörd sjrief of fuitjes biej ‘aantal’, nae: de taal zelf. Dao is min aandach veur. Zeker 20.000 vmbo’ers begriepe geweun tekste neet. Ich laot uch daoveur zitte mit de volgende zin oet eine breef van Mijn Overheid. Nao d’n datum sjteit: ‘Onderwerp: Onbeperkt geschikt bij vernieuwing’ – geweun wäörd, mae waat zólle de leste veer beteikene?
Dit is de 29e aoflievering vaan de rubriek Lidioom. De twiede serie vaan 15 zit d’r bekans op. Alle veurege aoflieveringe kint geer trök leze in eus arsjief.