Lidioom: Meuskes oet de Maas

Efkes trök. Vurge waek injde ich mit Grünzeug ofwaal: greun grei. Greunte veur in de sóp, roewkos. Ich höb nag mier greunsigs mae det kaok me meis: meuskes. Sjiek waord det ich van mien moder lierde. Duuster ouch? De Franse neume Moder Maas La Meuse, mae ‘meuske’ zal zeker gein klein Maas zien.

Waat waal? ’t Waordebook van Helje meljt det ‘meuske’ ein klein meus is: kleine mus. Allei: zoeget hoof ich neet te behandele biej Lidioom. Mesjiens waal veur de aansjpenders ónger ós: meuske is ouch ’t verkleinwaord van moos, kool. Klein achtergebleve moos, vól óngesiefer: meuske. Mae ’t geit zich hiej um ’t miervoud, meuskes: det zien sjpruutjes. Sjpruutjes? Jazeker. Mien moder (1902) of häör moder of vader (geb. 1852), of luuj van weit-ich-wo (ich höb ‘t waord meuskes nag neet in waordebeuk gevónje) zoge det duvelsgood. Kiek mit, veural nao die sjpruutjes die nag aan de sjtrónk zitte; det lieke dieke erte, mae ‘t zien klein hötjes moos. Mislökde hötjes sevojemoos, of ouch kappes (witmoos).

Meuskes: lever es sjpruutjes. Of käökbulkes? Det waord veur sjpruutjes sjteit in ein waordelies van ’t Wierts of dao in de buurt. Zeker gein 8+, mae waal ei waord det te gebroeke zal zien. Bah, gooj mien käökbulkes sebiet in de GFT-bak, zaet eine jóng dae heim kump en ruuk…

Nou ja: ich gaon nieks veursjrieve. Ich dach waal: käökbulkes zól, det get veur op de menukaart zien? Nae. Det zit zoe: biej gelaeg van ’t Jaor van de Limburgse Dialekte, wach, ich citeer: komt er in 2016 (…) een soort van Michelin Gids met restaurants die Limburgse gerechten op hun kaart hebben staan. Ich haopde det ’t neet allein um aetes zól gaon mae det die gerechte ouch Limburgse name zólle kriege. Ich höb veursjtelle gedaon mae nieks mie geheurd. Ich dach ónger angere aan ein vervanging van ‘kids’ (in: Voor de kids) door kroekesjtöp – kroek en sjtop zien horecawäörd dus…zal ‘meuskes’ waal te wied gaon. Mae wen me de Limburgse keuke wilt promote, woveur neet?

 

Dit is al weer de twintegste aoflievering vaan de rubriek Lidioom. Al de veurege aoflieveringe kint geer trökleze in eus arsjief.

 

 

 

← Ga terug