Lidioom: Mit lieswages nao ‘t OLS
Hemelvaartsdaag leet ich uch achter mit wäörd die ein of anger gevaers (vervoermiddelen) beneume. Det woor waege ’t waord ‘vaart’ van Hemelvaart. Ich wól dao neet langer euver doorvare – laot sjtaon doordavere. Edoch…
Ich zoog det ’t WNT (Woordenboek der Nederlandsche Taal) mier es 4000 wäörd besjtaejt aan de vaarwäörd ‘voortvaren’ en ‘voortvarend’. En waat vónj ich dao? ’t Waord voortvaring. Beteikenis nómmer vief kump róndj de Piel veur, en waal, ich citeer: (ook gebruikt als ben. voor) het geheel van paard, bijbehorende kar(ren) en tuig. Zoe, det is ein sjieke umsjrieving van gevaers.
Sjiek? Ich pakde mich veur de dudelikheid ’t waordebook van ’t Vinrods. Nou: dao sjteit vortvares: vervoer, transport. Dudelik. Metein d’rnao kump vortvaring: vervoerMIDDEL Vortvaring guf dus aan womit ‘t vo(e)rtvares gebäört. Daoveur de zin: ich wil waal nao ’t OLS in Zaerum zónjig, mae höb gein voertvares.
Det is ei sjiek waord veur aaf en toe te gebroeke, neet? Neet? – dan verzin ich ein anger gevaerswaord: lieswage. Jederen daag te heure biej ós, es leasewage(n) of leaseauto. Hoho: veer höbbe aafgespjraoke det veer wäörd van euver de grens neet altied gaon verlimburgse: det zuut dök kienjerechtig oet. Allei, dan gaon v’r det waord bekieke. ’t Ingelse to lease beteikentj pechte (pachten), mae eine leaseauto is geine pechwage.
Me kan dao waal pech aan kriege. Of dae wage verrakkere. No problem: vaar nao de graasj, waert dae wage gratis gerepareerd; det is gans mekkelik ofwaal lies – AN ‘licht, soepel, gemakkelijk, meegaand’ en zoe wiejer. Det waord gebroeke veer te min, vinj ich. Ei lies kiendj? Woveur neet: euver de päöl heurt me ein leises Kind – geine roewprengel zólle v’r zegke. Of ein meek. Aafgesjpraoke: eine lieswage is eine huurwage wo me min probleme mit haet.
P.S.: went geer zónjig nao Zaerum gaot, nao ’t OLS ofwaal Aoje Limburger, gaon dan sjötters mit of sjötte? Of allebei?
Lidioom is ‘wekelekse rubriek op de website vaan Veldeke euver ‘t eigene vaan de Limburgse taol. Veur ederein dee ‘t Limburgs beter wèlt begriepe of liere sjrieve. Alle veurege aoflieveringe zien trök te vinde in eus arsjief.