Lidioom: ’n nui rubriek vaan Wim Kuipers veur Veldeke

Mèt väöl plezeer prizzenteert Veldeke Limburg ’n nui rubriek vaan de hand vaan Wim Kuipers euver de Limburgse taol. Lidioom dus. Aoflieveringe vaan Lidioom versjijne wekeleks op donderdag op de website vaan Veldeke Limburg en op de Facebook- en Twitterpagina vaan Veldeke. Lidioom is zoewel in ’t Limburgs es in ’t Nederlands te leze.

De naom is ’n sametrèkking vaan de wäörd Limburgs en idioom. Idioom heet betrèkking op ’t taoleigene vaan ’t Limburgs. Wim Kuipers umsjrijf de kern vaan zien rubriek es volg: “ ’t Eigene vaan de Limburgse taol zit in ’n meneer vaan wäörd make die ’t Nederlands neet heet; dink aon wäörd wie drinkes, roukes en ’t bereumpde doefes: doevekot. Neve die eigeheid en opmerkeleke of prachtege wäörd en oetdrökkinge zien wijer nog belaankriek: ’t gebruuk vaan (die) wäörd en de versjèlle tösse wäörd die väöl op ein liekene.”

Plezeer veur lezers en sjrievers

Zien doel liet ziech es volg umsjrieve: “De prach en krach vaan ’t Limburgs laote zien, zoetot de lui weer plezeer kriege in hun moojertaol – die Lust am Text weurt dat wel geneump. Plezeer veur lezers, meh zeker ouch veur auteurs bij ’t sjrieve of zeuke nao wäörd. Lidioom is te zien es ’n verzameling materiaol, veurzeen vaan suggesties, ideeë en citate die, ierlek gezag, veural bedoeld zien veur lui die spraankelender, levendeger Limburgs wèlle sjrieve; Limburgs watste mèt plezeer leus”.

Euver d’n auteur

Wim Kuipers heet zien spore es auteur euver de Limburgse dialekte verdeend. Heer publiceerde versjeie beuk euver dat oonderwerp (Wat zaes se?, Aek op de sjóttelsplak, Moles van de sjalevaeger) en geneet och bekindheid es sjrijver vaan de rubriek De Letterbak die jaorelaank in de gezèt De Limburger versjeen en boe-in Wim oonder mie vraoge vaan lezers euver ’t Limburgs beantwoordde. Wijer stoont heer aan de weeg vaan de serie Platbook en verzörg heer ’n online poëzierubriek Veldgewas.

Mèt Lidioom slut Wim Kuipers weer aon bij e zijspoor vaan Veldgwas. Dao-in sjreef heer regelmaoteg zie Woord vaan de Week, mèt dao-in aondach veur bezunder wäörd in de Limburgse taol. In Lidioom weure die wäörd noe ouch veurzeen vaan e lètterkundeg kader.

Veur ‘n euverziech vaan de ierste aoflieveringe vaan Lidioom kint geer hei kieke.