Lidioom: Oetgelits mit beprikke

Vurge waek woor ich al biejnao begós aan ‘t waord det veur mich biej prikke (opvange) heurt: (oet)litse. Det zit zoe. Jaore geleje heurde ich door d’n tillefoon: S. haet zich de naas gebraoke… Auw – det deej pien. Hae litsde oet, mit zien laere zaole, of mótte veer van zäöl kalle – nae zaet het waordebook van Remunj: doe höbs eine lap ónger de sjoon, de sjoester waert baovemoerdieks schoenlapper geneump, nou ja – eine laere lap is get angers: det is eine zeem, wo bön ich noe – ao ja: dae vrundj litsde oet op de glate vloer, sjloog zoe biet­je koekel­uit, wól zich nag prikke, det lökde neet en hae veel klaats kernelis mit zien naas oppe gróndj.

Prikke dus. Gein waord oet de Limburgse top-100, liek mich. Waal boejend. Eine geboejde kan zich lestig prikke, dach ich en doe zoog ich de elenj van de Koerde en dach wiejer: bön ich hiej neet oetgelits? Ich sjreef: (…) eine vlöchteling prikke kan allein wen dae bezig is te valle… Ich wól daomit aantuine det me ‘prikke’ neet gebroeke kan veur AN ‘opvangen’ wen det beveurbeeldj ‘opvange van vlöchtelinge’ zól zien.

Woveur neet? Höb ich ’t waord prikke gevraog of det daoveur neet gebroek moog waere? Wie mót ich det doon? Haet det waord eine 06-nómmer? Veur waem dit kwatsj vintj: mien bedoeling mit Lidioom is veural: laote zeen det (good) sjrieve in ‘t Limburgs sjpas kan gaeve; die Lust am Text.

En wie krieg me die? Dök door de wäörd op dich aaf te laote kómme, kieke waat ze zelf wille. Mesjiens wille ze gaaroet nieks van ós weite. Prikke woor in ’t waordebook van Haerle van 1884 ‘een bal werpen,  vangbal spelen’; nieks opvange. In ’t nuuj waordebook van H. zeen ich biej prikke: zie ook sjtuute, en biej sjtute (ein U minder, angere taalkundige deej de S) sjteit: zie ook prikke. Noe weit ich nag neet of me kan zegke: Moder beprikde Vera wiel ’t dae bal zoe top geprik hauw. Mesjiens bön ich hiej weer oetgelits. Gaon waal wiejer.

Reagere? Sjrief nao: redactie@veldeke.net

 

Lidioom is de wekelekse rubriek euver ‘t eigene vaan eus Limburgse taol. Alle veurgaonde aoflieveringe vint geer trök in eus arsjief.

 

← Ga terug