Lidioom: Raengelbaogtrui aafwinne
Aafwinne, laote winne, geweun winne: mit ‘t waord winne is hiel get gare te sjpinne. Nae, dit liek mich gein good gebroek van ein oetdrökking. Örges good gare biej sjpinne beteikentj: väöl veurdeil höbbe, veural get winne in de zin van verdene. Sent.
Mae veer wore doonde mit ‘aafwinne’. Emes de Nuujjaor aafwinne is: ierder zien mit felicitere. Noe dit: wen de Belzje wielrenner Rik van Looy (86) herdach geit waere, kan me mesjiens dees zin verwachte: Beheyt haet doe de Keizer van Herentals de raengelbaogtrui aafgewónne. Verklaoring. Rik II woor in ’61 en ’62 al werreldkampioen gewaore. Drei maol achterein, det zól get unieks zien…
Alle Belzje reje daoveur veur d’n Rik, ouch umdet de race in de Vlaonders woor. Mae in de sjprint klopde Beheyt, ouch eine Belsj, de Keizer mit ei paar decimaeter. Vraog: woor/is det aafwinne? Zelf dink ich van neet, wiewaal Van Looy daen trui al hauw. Hae kós dem dus kwiet waere, krek wie dae man van vurge waek dae geldj verloor wiel zienen taengesjtenjer einen dobbelsjtein naat gemaak hauw. Hiej is aafwinne neet good gebroek: Van Looy waerde belazerd, mae neet volges plan. Dus: gein good gebroek van aafwinne, en (L)idioom geit wie gezag ouch euver ’t GEBROEK van bezunjer wäörd.
Daoveur: ‘t guf nag ein anger aafwinne, ein al of neet sjaejlikke geweunde aafliere; neet kónne laote. Kóns doe det vloke neet aafwinne? ‘Liere’ liek hiej logischer, mae woveur? Ich weit det luuj dit aafwinne aafkäöre, ’t zól (wie in ’t AN) aafwenne mótte zien. Ich gaon mich dao neet euver ensjele. Oos waordebeuk zien neet dudelik. In Thoear kint me allein winne, meint ’t waordebook. Ich dink det det op hiel väöl plaatse zoe zal zien.
Taengeneuvergesjteld is aanwinne, det ein döbbel beteikenis kan höbbe: landj aanwinne (mae gebroeke veer det, veur zien wied weg van de Wadden) en AN ‘aanwennen’. Ich sjtel veur hiej ’t waord oet ‘t waordebook van Valkeberg te gebroeke: aangewinne, det liek teminste dudelik Limburgs. Det is get angers es juus Limburgs, of neet?
Reagere? redactie@veldeke.net of veldgewas@home.nl
Lidioom is eus wekelekse rubriek euver ‘t eigene vaan de Limburgse taol. Alle veurgaonde aoflieveringe zien trök te vinde in eus arsjief.