Lidioom: Roetsje op (g)litspoejer

Volgende waek al Alderzele (die D heurt me in Remunj waal ins). Ich höb dökker jaagsjnie mitgemaak daen daag en nutte kaoj. De Pruse höbbe de deur aop gezet, zag mien moder dan. Mae die opwurming, zólle de miense minder gaon oetlitse, sjievele? Kwisvräögske: waat haet de opwurming mit ’t waord (oet)litse vandoon? Eine wink: in ‘t waordebook van Haerle van 1884 sjteit glitsje.

Trök nao de opwurming. Minder gevreur? Code Gael dus veur wäörd wie slebrikke, sjliddere ofwaal Hollesj ‘baantje glijden’, ocherm. Det zól kónne, mae me kan väöl wäörd in ein anger beteikenis gebroeke. Ich vertaal oet ’t waordebook van Gronsveld: eine d’roetlit­se, aan de deur zitte, netjes boetewippe wie de Vlaominge zegke.

Zoe wil ich Oos Taal höbbe, zjwoeng, humor, nuje kiek op waat vervaelend liek. ‘t Waorde­book van Ech zaet: wie Jeu de lotto wón leet hae ‘t ‘m lit­se; det is taal, Lim­burgs; neet det gezeiver det in de gezette sjteit, det me in Wiert angers kalt wie in Nederwiert. Of ‘t Amerikaanse sjrie­vers get bómp det in Sjotlandj ‘t Ingels neet det van Trumpanië is.

Allei, bön ich weer aan ‘t knote­re, de Leffe litsde mich neet good wie ich dit sjreef, en dan kan me gein lit­spoe­jer gebroeke. Det deje ze vreuger waal op ein dans­vloer die get roew woor. Noe höbbe ze biej die 1400 festivals in Nederlandj angere poejer. Ich dink: dao roetsj ’t dich van in d’n daets. Roetsje is ei saort (g)litse, ‘glijden’ mae meis nao ónger, op ein roetsjbaan, van einen houp zandj aaf, ‘t nuuj jaor in roetsje.

Waat höb ich noe bewaerd: det roetsje in d’n daets, mót det neet roesje zien? Kiek noe wie prachtig riek Oos Taal is: oos roesje en roes, en toevallig gevónje. Nou ja: me mót aan ’t sjrieve zien. B: de wäörd dene oet de waordebeuk te vlöchte, en veer mótte die toesje. Ich höb litsetig in de aanbejing.

Ao jao, de kwis: det glitsje zól van vreuger oet femilie zien van glacier, Frans veur gletsjer; dink ouch aan glace (ieske).

Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringe kint geer trök vinde in eus arsjief.