Lidioom: Sjnieder Schreurs

Waat dach geer: geit dae aanein door mit det gemiemel euver eins en -ein, klein wäördjes die… Die waat? Juus die zien belangriek veur Oos Taal. ’t Limburgs waert noe zelfs door ’t Riek es echte taal erkind. Woveur? ’t Is genóg angers um gein dialek van ’t Nederlandjs te zien. En det zit ‘m neet in ei bietje angers oetgesjpraoke wäörd. Ich dink aan taffel, taofel, toâfel of tóffel veur AN ‘tafel’, mae det zien gein ech eige wäörd.

Nag ei veurbeeldj. In 1994 waerde Peter Vaassen oet Beegden kampioen in de buut mit De kleiermaeker, eine kwaartieuw  later, noe dus, Theo Nellen es Frits Rits der kleermaker. Sjei mich meug, dao höbbe v’r toch anger wäörd veur: sjnieder en sjreur. Det sjreur heurt biej oos erfgood: wieväöl doezjende heite neet Schreurs?

Good, ich blief nag efkes -einen. In ein zin wie ‘t bleef aanein raengele (veurbieje dinsdig) haet -ein neet väöl mit ‘elkaar’ vandoon. Waal es ’t um verbinjing geit. Hae haet die plenk weer aaneingeklómmeld. Noe eine sjitterende regel oet ‘t  kirkeleed Een mens te zijn op aarde van Huub Oosterhuis. ‘t Darde couplet begint zoe: ’De mensen hebben zorgen / het brood is duur/ het lichaam zwaar/en wij verslijten aan elkaar’. Wen ich hiej vertaal: veer versjliete aanein, kán det beteikene: ummertoe (kónsjtantj, ónóngerbraoke) versjliete, aojer waere; det haet dan nieks mit óngerling kóntak vandoon. Daoveur: veer versjliete ós aanein. Zoe fien is Oos Taal.

Hiej hauw ich wiejer wille gaon mit ’t waord fien, mae doe keem de vraog of ei Limburgs waord veur ‘ontbijt’ besjteit. Dinsdig wie ’t aanein raengelde wore al twintjig wäörd en reacties binne, wobie: Zegke veer niks teage…eate veer op!!! Aod mupke, mae biej ’t waord ‘ontbijt’ heurt mier es aete. Zuug twie wäörd die ruum hóngerd kilomaeter oetrein (uit elkaar!) ligke: mörgeskoffie (Valkenburg) en mergekoffie (Venray). Ich wies al op die S in ’t Valkebergs, die ich biej ’t Lidioom wil raekene: aovesaete, aovesklok, aovesraengel en zoe wiejer.

Wiejer: ich zal iers get miemere euver de vraog nao nuuj wäörd.

Reagere? redactie@veldeke.net of veldgewas@home.nl

 

Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringe zien trök te leze in eus arsjief.