Lidioom: Swaffele taenge Landgravenares

Lidioom is geine cursus, höb ich dökker gezag. ’t Geit zich um sjpas, plezeer aan taal, Oos Taal. Plezeer aan of in: dao dink ich euver nao.

Wiejer wil ich wied weg blieve van veursjrifte en det-moog-neets. Naodinke moog waal – gaer. En dan vinje: det en det vinj ich minder en waal wiel… Of de cabaretier oethange en laote zeen wie belachelik get is. Waat is good? Socrates, Spinoza, Kant höbbe noets Limburgse wäörd geheurd. En Lidioom hanjelt zich veural um die wäörd. Ouch um nuuj gemaakde wäörd.

Make? Nieks te máke, taal óntsjteit meine väöl deskundige. Krek wie de netuur óngevraog veur nuuj saorte insekte, kwekkerte en plantje  zörg. Allewiel aevel hulp de miens daobiej. Ich laes euver mónsters van huunj, die zich neet ins in laeve kónne haoje.

Det is mit wäörd ouch gebäörd. Waem herinnert zich nag HET waord van 2008: swaffelen. Ich jat de beteikenis biej Wikipedia: het aantikken met de penis, vaak met herhaalde bewegingen, van andermans lichaam of een voorwerp. Ich vinj veural det bewegingen genitaal, pardon: geniaal.

Ich sjrief dit ammaol waege ei waord det mich al ein waek aangaap of ’t wilt zegke: wils doe get van mich? Bön ich neet good genóg veur dich? Waat woor? Ein óngelök. Eine winkeleer oet Ubach over (euver?) Worms woor dinkelik in Sjpanje mitgerete door eine weuswilje waterreus.En wie neumde de gezet dae man jederen daag? Landgravenaar.

Tja. Wie begin jaore tachetig drei dörper samen ein nuuj gemeindje móste waere, deende dao eine naam veur te kómme. Me koos veur eine gans nuje: Landgraaf. Det woor geine eigenaam mae zaaknaam. Eine landjgraaf is eine kilomaeters lange wal van aerd, bedoeld um luuj die dao waal get te zeuke hauwe taenge te haoje. Angere naam: landweer, van zich waere.

Prachtige historie, mae wie mós de gezet eine miens dae dao woonde noe neume? Landgraver? Is det geine boereknech? Waat dan? ’t Moogde nieks mit dialek vandoon höbbe, begreep ich: det boeregedoons. Allei: ein boerin van de Sjeet (Schaesberg) zal dan waal ein Langravenares heite; of mesjiens waal Landgravenarin.

Reagere? Sjrief nao: redactie@veldeke.net

 

Lidioom is ‘n wekelekse rubriek euver ‘t eigene vaan de Limburgse taol. Alle veurege aoflieveringe kint geer trök vinde in eus arsjief.

 

← Ga terug