Lidioom: Twie bein baovenein

Mit eins en ins kan ich noe waal mindere, tuntj mich. Mesjiens nag efkes waat mich veur ouge sjteit. Hiel kórt: ins leefs allein gebroeke wen ’t vervange kan waere door ‘es’, oetgesjpraoke mit ein sjtóm E. Kiek ins of de pos al gewaes is. Höb ich det al ins gezag, meins dich? Laot ins zeen die foto.

Mien eins kan me neet vervange door ‘es’. Zuug: nao nag ins (es) trökblajere waerde ze ’t eins; hiej kan es zeker neet. Eins gebroeke v’r dus biej ‘dezelfde meining es emes angers höbbe, en twie: wen det eins ‘eine kier, einmaol’ beteikentj. Nag ins: woveur mót det? Ach, ich zeen det es ei taalsjpelke.

Wiejer. In ’t waordebook van Mesjtreech zeen ich: die vaze zien eins ofwaal geliek, AN ‘eender’. Zól me hiej dan einder kónne sjrieve? Um de nondedinges neet. Ich höb det einder noets gelaeze of geheurd, ich vinj ’t sjeif vertaald Nederlandjs.

Eins kan ‘eine kier’ beteikene, zag ich, of einmaol. Sjrieve v’r det aanein? Ich vinj van waal, en vraog sebiet aandach veur aanein, den ich höb de bloodsjörf aan de Hollesje wäörd ‘elkaar’ en ‘mekaar’. Woveur zól me die gebroeke es v’r prachtige eige taal daoveur höbbe. Wiene zeen v’r ós weer? is eige taal, Oos Taal. Zaet me: wanneer zien we ons weer, dan is det veur väöl luuj foutief Nederlandjs. Nag get van die veurbeeldje: wiene kómme v’r weer biejein. Ze lepe netjes achterein. Lestiger is: na elkaar; keze v’r veur nao-ein? Aanein is lestig: naoein.

Nag get eine. Opein, baovenein, einen óngerein (een *onderelkaar, probeer det neet…), (…) en die twie Venlose bein, die loupe noe al jaore naevenein, zingk d’n einselgenger, den hae is einzaam (en verlaote), nieks geine leve naevenein – nae, det kan net neet, dink ich.

Trök nao aanein; det haet mier beteikenisse, zoewie: aan ein sjtök door. ’t Bleef aanein gete = beestig hel raengele. In ’t waordebook van Thoear sjteit: aan-ein-aan: onophoudelijk. Waat ich nag neet gevónje höb is: hae zal aanein waal kömme: binnenkort, allein aevel wen d’r binne ei keteer kump.

Reagere? redactie@veldeke.net of veldgewas@home.nl

Lidioom is eus wekelekse rubriek euver ‘t eigene vaan de Limburgse taol. Alle veurege aoflieveringe zien trök te vinde in eus arsjief.