Lidioom: Umme um ei muulke

’t OLS is oetgesjaote. Sjötterie Sint-Willibrordus (Meil) haet gewónne. Väöl wiechtiger liek mich det ’t zöstal det d’n Um mit nao de Piel kós naeme veer vrouwluuj telt. Veer! Mótte v’r noe aangepasde wäörd veur sjöt en sj… Ich zól neet dörve.

Zelf bön ich nag neet hielemaol oetgesjaoete, mit OLS-wäörd. Ich neumde al achteropsjöt ei sjitterend waord, de leste man van de zös, de man dae de besjlissing kan bringe. Woveur zól det ei bezunjer waord zien? Gans geweun toch? Nou nae. ’t AN kint bao gein wäörd die mit ‘achterop’ beginne. Mesjiens umdet dit achterop negatief klink: dink aan achteropgeraak(t). Enne: oos waord zoog ich maondjig boes in de gezet. Hauwe ze gein Hollesj waord? Ich zoog zelfs ei gans nuuj waord: vooropsjöt. Hoof van mich neet. Ich weit neet of sjötter EIN einen epaarte zól zien. Haet hae ’t lestiger?

En dan: ’t OLS geit zich veural um d’n Um: de trofee veur de winnende sjötterie. Dao kan me mekkelik ei wirkwaord van make: umme ofwaal winne. Zól Neel nag ins umme?, vroog ich miene vruntj. (Euver die T zal ich ’t nag waal ins höbbe).

Woveur noe neet? Nou: dit gedoons (van mich) haet neet väöl mit (L)idioom vandoon. Dus waal ei bietje? Mesjiens. ’t Geit zich um bezunjer miervoude, wie (Mesjtreechs) vrund-vrun. Hiej zeen v’r geine miervoudsoetgank (waat ei waord), mae de leste letter gesjrap waere. Bekiek uch noe vrundj-vrunTjelik, puntjelik, óndoorgrunj(d?)elik en me haet get um euver te…

…zjwamme, zólle versjtenjige luuj knotere. Ich zeen dao LAT in, die Lust am Text, wen me teminste dao zien vrundin (Hollesj?) biej geit haole, die dan  puunt (puuntjes) guf? of muundjes, nae muulkes (bah: van moel).

Mae woveur zól me zoeget sjrieve? Det wil ich óngerzeuke. Vraog daoveur: woveur zól me in ’t Limburgs sjrieve? Is dao al ins good nao (nao)gevraog? Neet det ich weit. Geer wit waat uch te doon sjteit, zag Limburgicus Lei Meisen dan: aon de geng!

Ich höb al ein klein doezjend wäörd; die kómme aevel neet hiej te sjtaon, in Lidioom. Volgende waek euver (anger) nuuj wäörd.

Regare? Sjrief nao: redactie@veldeke.net

Dit is ‘n aoflievering vaan eus rubriek Lidioom, euver ‘t eigene vaan de Limburgse taol. Altied twietaoleg, Limburgs en Nederlands (klik op de vlegskes um te wissele). Alle veurege aoflieveringe zien trök te vinde in eus arjief.