Lidioom: Voertvares van get voertvaring
Al sjtarend nao ‘t waord voortvarend dach ich efkes: woveur höbbe véér det waord neet. Mae waat is höbbe, wie weit ich zeker det v’r det waord misse en zoe wiejer.
Wiejer bleek ’t WNT (Woordenboek der Nederlandsche Taal), det mier es 4000 wäörd aan de wäörd ‘voortvaren’ en ‘voortvarend’ besjtaejt. En waat vónj ich dao? ’t Waord voortvaring. Beteikenis nómmer vief kump róndj de Piel veur. Ich citeer: Gelegenheid om te rijden; inz. echter: datgene wat men bij het rijden behoeft, en dan ook gebruikt als ben. voor het geheel van paard, bijbehorende kar(ren) en tuig. Zoe, det is ein sjieke umsjrieving van gevaers. Sjiek? Me mót bao ’t waord ‘gelegenheid’ op gaon zeuke um te weite waat gemeind waert.
Daoveur ins kieke waat ’t waordebook van ’t Vinrods te beje haet. Hiel get, zoewie vortvares: vervoer, transport. Dudelik. Metein d’rnao kump vortvaring: vervoerMIDDEL Ich moog noe óngersjied gaon make tösse dit vortvaring, en ’t algemeiner waord vortvares: det sjteit veur ’t begrip ‘verveur’ (transport). Ich verzin ein theoretische zin, euver D-Day vandaag): Jaomer genóg lökde ’t vortvares van al die vortvaring neet. Anger veurbeeldj: ich wil waal kómme zónjig, mae höb gein voertvares.
Voertvares? Woveur die OE? Ach, ’t voert-gebied is get groter es det van vort. Wiejer is vort ouch algemein Nederlandjs, in de beteikenis ‘voort (weg) en es twiede: verrot, corrupt. Ofwaal: voert liek mich baeter broekbaar, ein sjpannender waord mesjiens. En zólle veer die van daobaove discriminere? Biej bei de wäörd (vortvares en vortvaring) sjteit ’t teike det ze bao neet mie gebroek waere; dus: ze kónne ze misse…
Wiejer: ich zeen in de waordebeuk biej voert mier meugelikheje. Veurbeeldj: voertmake is get kwiet waere, plus opsjete. Noe mót me mit det voert veurzichtig zien. ’t Waord vortplante is dinkelik vertaald AN, mae waem zaet det?
En dan nag? Ich mót daoveur efkes kwiet det ‘t neet de bedoeling is obbernuuj te beginne mit mien Algemein Gesjreve Limburgs – vort verbeje en zoe wiejer: ich bön neet gek gewaore; voert dus ofwaal VOORWAARTS.
Lidoom geit e paar weke mèt vekantie. Meh begin juli goon veer gewoen weer wijer mèt dees rubriek. Oondertösse kint geer alle veurege aoflieveringe trökleze in eus arsjief.