Lidioom: Wermsig naat

’t Limburgse (det mót waal beweze waere) achterveugsel -sig kump biej nagal get kleure veur, höbbe v’r gezeen. Greunsig, gaelsig, nag mier. De vraog is: zól dit -sig nag produktief zien? Produktief beteikentj hiej: kan me det -sig maekelik achter anger wäörd zitte en waat saort wäörd. Kleurname zien dudelik, mae mesjiens zien allein kleure die van leech nao dónkel gaon gesjik. Wit en zjwart heure dao neet biej, dink ich, mae griessig kan ich mich good veursjtelle. Gaon v’r nag neet? Nae, ich vinj ’t nag get griessig.

Wit dan? Ich vroog de vurge keer nao meininge euver *witsig. Det sjterke beteikentj doorgaons det dit waord neet veurkump, verzónne is. Ich hauw det mótte zegke. Ich vroog namelik nao de meugelikheid van ’t waord *witsig. Ich kreeg twie reacties (danke danke), mit verklaoringe van det waord. Sorry: ich wól ein meining euver mien meining det *witsig neet gebrukelik is wiel de kleur wit gein dudelikke nuances haet, krek wie zjwart. Kwestie van geveul dink ich. Haet veur mich nieks mit (taal)weitesjap vandoon. Ich mót nag weer ins zegke: Lidioom is veural veur sjrievers, en die kónne doon waat ze wille.

Trök nao -sig. Ei waord det ich vanaaf de klómpesjool geheurd höb is naetsig: ei bietje naat. *Dreugsig aevel, det zal geine sjrieve. Ich mót noe de vraog sjtelle: haet det -sig mesjiens get mit de zintuge vandoon? Kleure heure biej zeen, naetsig is geveul, biej ‘sjmaak’ heur ich noe nag ’t zoersig van mien moder (geb. 1902). Of is ’t zuursig gewaes? Neet zoe wiechtig. Zoersig is AN zuurachtig – dus…

Ich dink det ich in de jaore die mich nag gegaeve zien dit -sig neet zal doorgrónje – wen det al meugelik is. Ich hauw ’t euver zintuge, geveul. Woveur vinj ich naetsig gans geweun, en klinke kaodsig (Remunj: kaedsig) en wermsig wie eine kanarie dae de gansen daag blaf? Allei: ich bön klaor mit ’t morfologisch angers van Oos Taal, en gaon wiejer mit bezunjer wäörd en oetdrökkinge.

Dit is de 17e aoflievering vaan de rubriek Lidioom. Alle veurege aoflieveringe kint geer trökleze in eus arsjief.