Lidioom: Weuns: get geweuns?
Geine haet hoeswirk ingesjik. Prima: die waordsjpeuling woor get al te geweun. Die waat? Kump volgende waek.
Ich zól wiejer gaon mit wäörd die mit wone en ‘hoes’ vandoon höbbe. De vurge Lidioom hauw es köpke: Hoesweuning, ei waord det neet besjteit, en gein algemein waord waere kan. Ich wól twie wäörd die óngevier ‘tzelfde beteikene naevenein zitte, dao éin waord van make, en dan laote zeen det ’t zoegezag geine eineiige tweerling is.
Wie det? Me leus waal det weuning deftiger zól zien, officiëler, ambtelikker. Zól det? Dao kan me daag euver sjtraevele. Nou ja: ’t huuske woor vreuger de wc. Geine deftige miens aevel, eine dae ’t waord ‘bóks’ neet lies gebroekde, zal gezag höbbe det d’r efkes nao ’t weuningske mós.
Ouch oos huuske haet synonieme. Kan neet angers. Ich höb ins ’t gelaeg gelaeze. Sjiek eige waord: det kan me neet verhollesje. De wc vreug um hoeswäörd, wäörd die binne gezinne of femielies gebroek waere. ’t Ierste hoeswaord det ich heurde woor graassoep: zoe neumde de euverbure kirvelsóp.
Trök nao ’t huuske. Ich dink det väöl wc’s Tante Zus of To geneumd waere; To riemp op clo, mae alderlei name kónne – ich höb van Tante Jetje geheurd; zekehoes Remunj jaore zöstig.
Intersanter is det ‘hoes’, veural in samensjtellinge, get wie ‘thoes’ of heim beteikentj. ’t Waord hoesmös kan me neet vervange door weuningmös. Weuningraod: noets van geheurd. Kónklusie: weuning en hoes zien mae veur ein deil synonieme, allein wen ze ‘geboew’ beteikene. En dan nag haet me gein weuning van bewaring.
Weuning: inins sjoot mich ’t waord weuns te binne. Zeker ein ónbekind naefke van ’t Vlaomse woonst ofwaal weuning. Det zal ein verkórting zien van woonstee of -stede. Weuns: det is zeker gein verkierd Limburgs. Ins probere: Chantal zeuk nag veur ’t inj van de maondj ein weuns. Get veur in te wone, waat is (noe) neet zoe belangriek. Hoof neet väöl te zien. Weuninge tekórt. Ich dink aan de jaore vieftig wie väöl pas getrouwde köppelkes biej moder baove móste wone.
Reagere? redactie@veldeke.net of veldgewas@home.nl
Lidioom is de wekelekse rubriek euver ‘t eigene vaan de Limburgse taol. Alle veurege aoflieveringe zien trök te vinde in eus arsjief.