Lidioom: Wiet van ‘t CBR

Witte Dónderdig leet ich uch zitte mit ein vraem zin, oet eine breef van de euverheid. Hiej kump die nag ins: Onderwerp: Onbeperkt geschikt bij vernieuwing. Gans geweun wäörd, sjreef ich, mae waat beteikene de leste veer? Det woor gein vraog, zeker neet aan uch. Eigelik woor dit citaat ein antjwaord aan (nutte) men van de gezet. Ich wól laote zeen det netjes Nederlandjs nag gein good Nederlandjs is.

Waat woor en is? Oos gezet, De Limburger, sjrief dökker det dialek ‘leidt tot laaggeletterdheid’, en det me dan ein baan waal vergaete kan. Geine wilt die prengels. Ich citeer weer: Maatschappelijk isolement, achterstand op de arbeidsmarkt, werkloosheid en slechtere gezondheid zijn vaak je deel. Je wordt een paria aan de zelfkant van de samenleving. Wirkloos, paria: det dialek is inins de verklaoring det hiej zoe wienig vakluuj te vinje zien…

Mae ’t góng zich euver die zin. Laot ich die verduutsje veur dees ganse aaflevering ónbegriepelik waert. De zin sjteit in eine breef van het CBR en beteikentj det de miense die dae breef kriege, häör riejbewies kónne laote vernuje; de dokter haet gein aafwiekinge gevónje. Is det alles? En haet det get mit (L)idioom vandoon? Zeker: ich höb plezeer aan die zin, krek wiet geer mót lache mit die buut euver einen ambteneer dae noer sjtóm dinger duit. Plezeer euver wiet geer dink euver ‘t waord wiet hiejbaove. Alles Lidioom.

Neet al te sjterk, Kupers. Good, dan bewaer ich det d’r ein idioom van de amteneretaal te make zal zien. Nou en? En is dees zin dao ei veurbeeldj van? Nae. Interessant liek mich waal wie dees zin óntsjtange is. Haet dao eine aan gewirk, is die mesjiens aan drei baasjes veurgelag? En höbbe die zich aafgevraog of de miense die dae breef kriege alles waal begriepe?

Laot zitte. Ich bön door miene grel euver ’t ummer beziebele van Oos Taal op eine ziewaeg belandj. Sorry. Mae woor ’t toch ’t laeze waerd? Dan de volgende waek euver det wiet hiejbaove – ouch sjpannend.

Dit is de daartegste aoflievering vaan de rubriek Lidioom die vaanaof september vaan verleie jaor wekeleks euze website seert. Alle veurege aoflieveringe vint geer trölk in eus arsjief.