Lidioom: Zoe sjprik Sarah 87

Allei dan, ich höb mich weer get biejeingesjerd euver ’t waorddeil -ein. Wen ’t einen óngerein waert, heur ich det gaer. Einen óngerein liek mich dudelik en vertaal det neet in ’t Besjaaf Goois, dan waert me oetgelache (het was daar een ondereen…). Veer krege vreuger jeder waek get óngerein op d’n telder: hutspot. Waat dao in zoot, woor neet zoe wiechtig, mesjiens waal twie versjillende saorte moos.  Wortelenstamppot hoot moereratsj – ja, noe wáért ’t einen óngerein. Gauw get angers.

Ich kreeg ei prachtig waord vanoet de diaspora (Wageningen), van Annie van Gansewinkel: deindanger. Letterlik, wen ’t euver vrouwe geit: de ein en de anger. Ich verzin: ze zagte zich deindanger gojendaag, mier neet. Ofwaal: ze wore lóch veurein. Det dangerdein gaon ich zeker gebroeke wen ’t zich veur zól doon, den ’t liek mich algemein Limburgs, sónger sjtreepke of heutje (gaer commentaar op die T).

Ich sjreef mich dao veurein: voor elkaar. Kan det hiej? Besjteit det waord waal? Ich höb in zeve waordebeuk gezóch: neet gezeen. Kan de weitesjap mich helpe? Ich höb geheurd det de Leerstoel ‘Taalcultuur in Limburg’ van de Maastricht University de taal van Limburgse kuuj wilt gaon óngerzeuke. Koeien loeien, wie zal ‘t boeien hoe?

Waat ich geheurd höb is neet gans juus: me geit óngerzeuke wie boer en kuuj óngerein kalle. Of ein zjwartbóntje, dus Hollesje koe biej ein zaachte G de echelste bein (academische kuuj höbbe gein peut) hoog de lóch in sjmiet.

Oei, noe is ’t obbernuuj einen óngerein. Mien óngerzeuk bemeujt zich mit veurzitsels in kómbinatie mit -ein, waat in ’t AN meis weergegaeve waert mit ’t wederkerig (dao gaon ich nieks veur zeuke) veurnaamwaord elkaar. Ich höb al gezag: dao mót ich nieks van höbbe, van det waord. Oos Taal mit al häör -eine vinj ich baeter.

Neet te gluive? Bedink dan zelf zinne mit -ein biej anger veurzitsels. Ich gaon trök nao de vurge waek, wie ich uch leet zitte mit aanein, in beteikenisse wie ‘achter elkaar’ of ‘voortdurend’, beveurbeeldj in: ’t bleef aanein raengele. Ich meljde nag: hae zal aanein waal kömme. Hiej kan mesjiens baeter achterein sjtaon. Mien óngerzeuk haet dus al get opgeleverd: waat einen ónrös, ze geit ós achterein waal get verduutsje, Sarah 87.   

Reagere? redactie@veldeke.net of veldgewas@home.nl

 

Lidioomk is eus wekelekse rubriek euver ‘t eigene vaan de Limburgse taol. Alle veurege aoflieveringe kint geer trökleze in eus arsjief.

 

 

← Ga terug