Lieske en de Kitten – Twieëtalige kingerbeuksjkes in 6 diejalekte

Twieëtalige kingerbeuksjkes in 6 diejalekte

Klein kinger vertroewd make mit ‘n taal dao drieënt ‘t um óm ze laevetig te houwte en neet te laote versjwiende. In jeker taal is ‘t zoeë dat kingerbeuksjkes neet allein daobie helpe meh zoeëgaar ónmisbaar zunt. Dat begint al mit vuuerlaesbeukjskes, meh óm vuuer te laeze hat me de (groeët)awwisj nuuedig. Gelökkig zunt d’r al semlich get beuksjkes in ein van de Limburgse diejalekte gesjrieëve. Zoeë hat Antoon Brouns ouch 3 beuksjkes gesjrieëve in ‘t plat die gónt uuever e klein maedje dat ‘t Lieske heisj.

‘t Biezóngere van de beuksjkes van Antoon is dat ze twieëtalig zunt, naeve ‘t hollisj sjteit ‘t plat. Vuuer lüj die mujte höbbe óm ‘t diejalek te laeze. Noe versjille de diejalekte semlich van-eij. Zien teks is in ‘t Klummisj-Ranzels meh van 5 angere plaatsje höbbe lüj de reks ómgezat nao hun eige diejalek. Die 5 diejalekte zunt Heitsers, Broenssems, Venrojs, Venloos en Valkebergs e.o. Houpelich kómme d’r nog get plaatsje bie, b..v Mesjtreech, Haele, Kerkrao, Zitterd/Gelaen.

Went ènne laezer van dit artiekel grel haet óm de hollisje teks óm te zètte nao ein van die 4 diejalekte kint hae of zie zich mèlle bie d’r oetgaever Bullseye in Kepèl. Ouch oet anger plaatsje natuurlich!

Vuuer de al oetgebrachde beukjskes, went me nao de site van d’r oetgaever geit kint me ‘t gewunsjde diejalek keeze.

https://www.bullseyepublishing.nl/product-categorie/kinderboeken/

Ei verzeuk aan de laezers umdat d’r neet väöl lüj zunt die de site van Veldeke bezeuke of uvverhoup weite dat Veldeke besjteit! Gaef dit dörg aan zoeë väöl meugelich lüj, meh vuueral aan jóng awwisj, want dao begint ‘t: bie de awwisj van jóng kinger. Me kint waal vanoet Veldeke of ‘t Hoes vuuer ‘t Limburgs nao VSO’s etc. gao, meh de awwisj mótte d’r achter sjtao. Angisj nots ‘t nieëmes.