‘Limburgs Accent’ vaste taolrubriek in de Limburger

De gezèt de Limburger, Veldeke Limburg, Levende Talen Limburgs en ’t Hoes veur de Kunste Limburg sloon de han inein. Ze zörge dit jaor veur ’ne maondeleks trök koumende pagina in ’t LEEF-katern vaan de gezèt mèt artikele, verhale, rubrieke en mie intrèssants euver de Limburgse taol. De rubriek geit oonder de naom ‘Limburgs Accent’.

Oonderwerp vaan ’t hoofartikel is de beteikenis en ’t gebruuk vaan de Limburgse taol in alle maotsjappeleke domeine. ’t Geit um persoenleke verhaole euver de plaots die ’t Limburgs heet in ’t normaal daogeleks leve. Daoneve weurt de pagina umlies mèt mie löchtege en humoristische stökskes

Uniek aon deze pagina is is ’t perspectief vaan binnenoet in alderhand versjèllende situaties boe-in ’t Limburgs ’n belaankrieke rol späölt. Dink beveurbeeld aon de taol binne ’t hoeshawwe, mèt vrun, op ’t werk, in de winkel, op sjaol, bij d’n dokter of bij ’n vereineging. De versjijningsvörm vaan de Limburgse taol in eus sameleving is aofwisselend en zoe weurt de rubriek ‘Limburgs Accent’ ouch.

Ester van Loo, veurzitter vaan Levende Talen Limburgs en initiatiefnumster zeet ’t zoe: Mèt deze pagina is de gezèt ’n beter aofspiegeling vaan de mietaolege Limburgse maotsjappij boe-in óuch ’t Limburgs ziechbaar maag zien. Good zoe! De wereld is jummers neet eintaoleg, Nederland is neet eintaoleg en Limburg is al zeker neet eintaoleg.”

In eder editie steit ’n ander thema centraol, zoe wie:

  • De Limburgse taol in de zörg, beveurbeeld: wie communicere zörgmètwerkers en patiënte oonderein?
  • De Limburgse taol en nui media, beveurbeeld: wat veur plaots heet de Limburgse taol bij influencers?
  • De Limburgse taol en relaties, wie goon geleefde um mèt hun moojertaol in ’t relatie?
  • De Limburgse taol en oonderwies: wie krijg mietaolegheid (en in ’t bezunder Limburgs) ’n ziechbaar plaots in ’t oonderwies?
  • De activiteite oonder de vlag vaan ’t Convenant Limburgse Taol wat in 2019 oonderteikend woort.

Dinsdag 26 jannewarie kump de ierste editie vaan ‘Limburgs Accent’ in de gezèt te stoon. Dao-in steit de Limburgse taol bij de melkamer vaan 112 centraal. ’t Artikel gief antwoord op vraoge wie: weure mètwèrkers geselecteerd op mietaolegheid? Wie weurt umgegaange mèt lui die in paniek in ’t dialek belle? Nao 26 jannewarie is ’Limburgs Accent’ edere lèsten dinsdaag vaan de maond in de gezèt te vinde, Mie informatie roontelum ‘Limburgs Accent’ is de koumenden tied te vinde op de website vaan ‘t Hoes veur de Kunste.

 

 

← Ga terug