Limburgs in de meziek: Marion Vervoort en Egbert Derix
Meziek is ummertouw ‘n daankbaar domein gewees veur de Limburgse taol. Bekinde troubadours wie Frits Rademacher en Jo Erens maakde lang geleie furore mèt hun ‘Loeënde klokke’ en ‘Limburg allein’ en zien ouch noe nog regelmaoteg op de radio te beluustere. Daan zien dao netuurlek de talloes vastelaovendsleedsjes die daankzij de opriechting vaan ‘t Vastelaovendsleedsjes Konkoer deveur gezörg höbbe toto de dreigende euvernaome vaan de Vastelaovend door Hollandse artieste veurkoume kós weure. En daan heet ziech ouch binne de popmeziek in de slipstream vaan Rowen Hèze ‘ne breie struim aon Limburgstaolege meziek oontwikkeld boe-in versjèllende genres vaan punk tot blues en hiphop gedije.
Meh ouch binne de klassieke meziek deit ‘t Limburgs zien intrejje. Zoe zat componis Egbert derix verleie jaor e gediech vaan Veldgewasredacteur Wim kallen op meziek veur ‘t Festival Vocallis, e leed wat tijdens dat festival vertolk woort door sopraan Marion Vervoort. ‘n Opnaome vaan dat optrejje kint geer hei beluustere.
Allebei zien ze evels ouch actief in de populaire meziek. Egbert Derix (Horst 1969) componeerde en späölde de soundtrack veur d’n documentaire ‘Nao ‘t Zuuje’. Heer maakde jazzmeziek mèt de bekinde trompöttis Eric Vloeimans en mèt de vaan Southern Comfort bekinde Iain Matthews. Zelf brach Egbert Derix ‘n album oet mèt es titel ‘Boomasiel’, boebij d’n diechboondel mèt deen titel vaan Govert Derix ‘t oetgangsgpunt vörmde en boe-op Egbert neve gediechte vaan Govert Derix en Frans Budé ouch gediechte vaan häömzelf en vaan Geert van den Munckhof op meziek zat. Dao is ouch ‘t gediech ‘Weej’ te vinde wat Egbert zelf sjreef en wat veur de CD woort ingesproke door Huub Stapel.
Weej
Ut strand lacht ôs toe
De palmbuëm wuive
Nag efkes en dá spoele we á
ôf neet, ut mákt gén verscheel
En látste blik
vánoët ut wassende water
nár dun boët in de verte
We hure ze schriëuwe:
‘Kôm trug, jullie hure heer!’
Má eur stemme verváge
Vreej, eindeluk thoës
Neet ôp en zeenkend schip
Geer kint luustere nao de versie van Geert van den Munckhof door op ‘t pijlke te klikke:
Marion Vervoort (America 1980) haolde de Limburgse hitlieste mèt häör nómmer ‘Stille vlinder’ boe-euver veer ieder beriechde op de Veldeke website (klik hei). Marion zingk in ‘t Americaans dialek. Dee nömmer steit op de CD ‘Nachtvogel’ mèt 8 ander Limburgstaolege nómmers boe-oonder ‘t gedicht ‘Alliën Weend’. Waor ‘Stille vlinder’ gesjreve veur häör dochter, ‘Allien Weend’ is gesjreve veur häöre zoon:
Alliën Weend
Tekst: Marion Vervoort
Muziek: Egbert Derix
Verschaole in ut greun
Örges anders dan de rest
Probeerde heej um daor te kome
Waor niemand waas gewest
Al heelde ze ‘m liëg beej de groond
Soms leek ‘ie dan hiël dichtbeej
Maar waas ‘ie verder weg dan oëit
De weend onder de vleugels
Dôch dat ‘ie àlles kos
Enne waeg di waas eum noëit geweze
Dus vloog heej en leet los
Al heelde ze ‘m liëg beej de groond
Soms leek ‘ie dan hiël dichtbeej
Maar waas ‘ie verder weg dan oëit
Alliën weend
Vogels zweve
Vogels zweve op de weend
Zuij heej ut vleege gaon verliëre
Soms dôchte ze van wal
Toch zudde zeen daat heej zien vleugels
noëit verleeze zal
Al heelde ze ‘m liëg beej de groond
Soms leek ‘ie dan hiël dichtbeej
Maar waas ‘ie verder weg dan oëit
Alliën weend
Vogels zweve
Vogels zweve op de weend
En zidde eum oëit zitte
Örges ver van heej
Alliën verschaole in de luwte
As en vogel zò vreej
Geer kint de video vaan dit nómmer bekieke en beluustere op YouTube.
In ‘t naojaor vaan 2024 versjijnt ‘t twiede album vaan Marion, getiteld “Het Echte Spel”. Dat weurt ‘n combinatie vaan gesproke en gezoonge wäörd.