Limburgs taollandsjap: tied veur verandering

Naotot de Limburgse taol in 1997 officieel erkind waor es streektaol op basis vaan ’t Europees Handvest, heet de provincie behoofte geveuld aon ’n adviesorgaan veur streektaolbeleid. Daotouw is de Raod veur ’t Limburgs in ’t leve gerope. In dee Raod zaote en zitte – neve gespecialiseerde taolkundege – ouch vertegenwoordigers vaan versjèllende organisaties die ziech mèt eus dialek bezeg hawwe. Zoe heet ouch Veldeke es groetste dialekvereineging ‘ne vertegenwoordeger in de Raod en dat is sedert jaor en daag dr. Lei Heijenrath.

De leste jaore kaom ummertouw mie kritiek op ’t functionere vaan de Raod. In plaots vaan advies te geve en ’n visie te oontwikkele op ’t streektaolbeleid waor de Raod ziech mie en mie goon bezeg hawwe mèt alderlei oetveurende take, die ze eigelek beter aon ander organisaties kós euverlaote. De Raod heet ziech bezonne op häör eige positie en heet noe e veurstèl gedoon aon de provincie um in de touwkoms anders te goon functionere.

Gemisde kans

Veldeke is bepaold neet gelökkeg mèt de oetkoms vaan die bezinning. In eus ouge waor noe de kans dao gewees um ‘ne flinke stap veuroet te zètte mèt eus streektaolbeleid en te zörge veur ’n structuur die garant steit veur ‘ne gezaghöbbende en breid gedrage touwkomsvisie op wie veer mèt eus dialekte mote umgoon. In plaots daovaan degradeert de Raod ziech in eus ouge tot ’n in ’t bèste geval vrijblievend adviescollege veur d’n député en in ’t slechste geval tot ’n excuis veur d’n député um zien eige planne door te veure zoonder ziech nog te hove verantwoorde nao de dialekorganisaties in de provincie.

Veldeke pleit daan ouch deveur um iers grondeg te analysere wat ziech op ’t gebeed vaan eus Limburgse taol allemaol aofspäölt in de provincie, neet allein bij Veldeke meh ouch bij ander organisaties en initiatieve die ziech de leste jaore höbbe oontwikkeld. Op basis daovaan kinne veer daan in euverlègk mèt alle betrokkene én de provincie koume tot ’n structuur die rech deit aon ’t belaank vaan de Limburgse taol en aon wat nudeg is um die veur de touwkoms te bewaore. Um euze kiek op de zaak dudelek te make, heet Veldeke ‘ne breef geriech aon député Koopmans. De completen teks vaan de breef vint geer hei.