Limburgse finale declamatiewedstriede

3 Jaor lank hebbe weej door Corona genne Limburgse finale mier kinne organisere waat gezeen woort as ein groeët gemis beej de kinder van de basisschoeële in Limburg. Gelökkig kinne weej de finale dit jaor waal weer halde. Op 3 juni zulle vanoet hiel Limburg de winnaars van de veurrondes aaf reize nao DOK6 in Panningen um eur winnend gedich veur te drage.

Hans Jacobs oet Venlo zal as prissentator op ein um bekinde ludieke meneer alle deilnemers veurstelle aan ’t publiek en ein deskundige 5 köppige jurie zal gaon beoordeile wae oetintelik as winnaar van dees finale met de trofee hoeswaarts meug gaon.

D’r wuurt gestreeje in 3 categorieën: de onderbouw van de klassen 3 en 4, de middebouw van de klassen 5 en 6 en de baovebouw van de klassen 7 en 8.

Umdet veur Veldeke alle deilnemers al winnaar zien kriege alle deilnemers ein geteikende oorkonde as ouk inkele prissentjes as dank veur eur deilname. Alle veurdrachte waere op film en foto vasgelag en vervólges op eine USB-stick euver gebrach en zal nao de deilnemers waere opgesteurd.

Uniek dit jaor zal zien det de finale live oetgezónde zal waere op Omroep Peel en Maas waomei idderein kin genete van dees finale.

Wilt geej de finale zelf wille beej woeëne, kom dan op 3 juni nao DOK6 in Panningen. Um 13.00 oor wuurt gestart en de toegang is hielemaol gratis.