Limburgse Kinderbeuk
‘t Waor al dèks genóg gezag: es veer wèlle tot de Limburgse taol behawwe blijf, daan mote veer beginne mèt eus kinder in ‘t plat op te veuje. Meh sinds kort weurt dao noe ouch ech werk vaan gemaak. ‘t Aontal kinderbeuk in de versjèllende variante vaan de Limburgse taol waor ‘t aofgeloupe jaor bekans neet te tèlle.
En ze woorte neet allein gesjreve meh ouch gekoch en (veur)geleze. De oplaog vaan ‘t door Veldeke oetgegeve Verhaólkes in ós Limburgs plat waor binne de kortste kiere oetverkoch en is al aon zienen twiede drök touw. En dat waor neet ‘t einege succesverhaol. Hei kort euverziech vaan wat alleinj al de lèste maonde zoe al aon Limburgstaolege kinderbeuk op de merret is gekoume,
- Verhäölkes in ós Limburgs plat, in 8 versjèllende edities, in ‘t Valkebergs, Zittesj, Echs, Zösters, Remunjs, Wieërts, Venrods en daan nog ’n combinatiebeukske mèt de eige spraok vaan alle diechters. Al aon d’n twiede drök touw.
- Bib boetst zich de bölles, gesjreve door Ron Leunissen en vertaold in ’t Nuts, ’t Echs en ’t Venrods. Kint nog bestèld weure bij ronleunissen@hotmail.com.
- Kinderfeeste mit Cielke en Baer, de bekinde kinder figure oet Venlo door René Vercoulen mèt teikeninge vaan Leon Peeters, te kriege in de bookwinkels in Venlo.
- ‘t Verhaol van Noor en ’t Coronavirus, door Monique Kerpen, ’t coronavirus veur kinder verklaord, nog te kriege in de bookwinkels in Ech, Zjwame en Neel.
- Teikene in Tegele, kinderversjes met illustraties door Truus Verbong en te bestèlle bij d’n Heemkundekrink Tegele.
En dao steit nog mie op stapel boevaan veer uuch op deze website op de huugde zalle hawwe.