Limburgse lès veur nuikoumers en spietoptante
Bij Veldeke koume dèks genóg vraoge binne vaan lui die Limburgs wèlle liere spreke. Dat zien soms lui die vaan boete de provincie in Limburg zien koume woene. Meh ouch geregeld Limburgers die vaan hoes oet “Hollands” höbbe liere spreke umtot hun awwers dachte tot de kinder daomèt beter oet zouwe zien, de zoegenaomde spietoptante.
De vereineging vaan taoldocente ‘Levende Talen’ heet sind einegen tied ouch ’n aofdeiling Levende Talen Limburgs. En die heet recentelek ’n subsidie gekrege vaan de Raod veur ’t Limburgs um daoveur ‘ne cursus Limburgs te oontwikkele. Op dit momint weurt de lèste hand gelag aon dee cursus. Levende Talen Limburgs geit die cursusse, wie ’t noe denao oetzuut, vaanaof 2023 verzörge. Wee daoveur belaankstèlling heet kint ziech (zoonder verpliechting) aonmelle via dit e-mailadres. Geer weurt daan op de huugde gehawwe vaan de oontwikkelinge.
Versjèllende dialekte
Esther van Loo gief al zoe’ne cursus in Heerle. Meh umtot ’t wieneg zin heet um iemes oet Venlo of Mestreech Heerles te liere, heet ze kontak gezeuk mèt e paar ander taoldocente, oonder mie mèt: Bas Vissers vaan Veldeke Krink Venlo, dee al lèsse Venloos leze en sjrieve gief. De cursus Limburgs dee noe oontwikkeld weurt is daan ouch zoe opgezat tot heer gemekelek kint weure aongepas veur versjèllende dialekte die Limburg riek is. Al zeet Esther debij tot neet veur eder dörp ‘nen apaarte cursus zal weure gemaak. De naodrök ligk op ’t gemeinsjappeleke vaan de taol.
Docente gezeuk
In de gezèt de Limburger vaan donderdag 1 september steit ’n oetgebreid artikel euver deze cursus. Dao-in steit ouch ‘nen oproop aon docente die ziech wèlle opgeve um de cursus te geve. Ze zeuke lui mèt ‘nen ‘taolegen achtergroond’ die leefs veur de klas höbbe gestande, de theorie achter de taol e bitsje kinne en veural leefde veur ’t Limburgs höbbe. Belaankstèllende kinne ziech hei opgeve.
Cartoon van Berend Vonk bij artikel in de Limburger