Limburgse spellingsapp Swiftkey noe veur ederein te gebruke

Sinds e paar daog is de proofperiood vaan de Limburgse spellingsapp veurbij en is d’n app officieel gelanceerd. Dat beteikent tot ouch lui mèt ‘nen Apple I-Phone of I-Pad dao noe gebruuk vaan kinne make. De moos wel evekes get meujte doen um alles te downloade en te installere. Alleriers mooste d’n app vaan Swiftkey (gratis) ophole in de Apple of Google store. Daan kinste in deen app de taole keze boeste gebruuk vaan wèls make. ’t Limburgs steit alfabetisch oonder “Limburgish”. Daonao mooste nog in de Instèllinge vaan d’nen tèllefoon of tablet Swiftkey es toetsebord touwvoge en touwstumming geve veur “volledegen touwgaank”.

Meh es dat allemaol gebäörd is, höbste e prachteg hölpmiddel um Limburgs te sjrieve. ’t Wèrk get anders este mesjiens geweend bis: oonderwijl totste aon ’t type bis, versjijne oonder d’n teks drei suggesties veur de spelling. Daobij is ouch altied de spelling dieste zelf intiks. Meh Swiftkey riech ziech in ierste instantie op de veurkäörspelling. Die steit daan ouch in ’t midde en is get vètter in lètters es de ander twie. Este niks deis, kees d’n app de veurkäörsspelling. Este per se get anders wèls, daan mooste op ein vaan de twie alternatieve klikke die links en rechs daovaan stoon (ein vaan die twie is altied d’n eige spelling). Hendeg is tot d’n app al veult aonkoume wats diech wèls goon type en deks al nao twie of drei lètters ’n suggestie gief veur ’t woord wat d’r aon geit kaome. Meh este dat neet wèls hoofste dao dus gei gebruuk vaan te make.

Enfin: veur wee ’t allemaol te lesteg is: de lokaal Veldeke Kring make ziech op um veurliechtingsaovende te geve euver wieste d’n app moos installere en gebruke. Es geer dao euren tèllefoon of tablet mètnump, kint geer dao medein alles in orde make. Veer hawwe uuch op de huugte vaan wienie en boe dat geit gebäöre.