Limburgse Taolquiz vaan Veldeke en De Limburger

’t Is al weer mie es e jaor geleie tot Veldeke in samewèrking met de gezèt De Limburger ’t Groet Limburgs Dictee organiseerde. Dat waor e groet succes, boe väöl lui oet de ganse provincie op reageerde door ’n vertaoling in te sjikke vaan ‘nen teks dee in de gezèt had gestande. De 40 bèste vertaolers woorte toen oetgenudeg um deil te numme aon de finale in Sittard. Nao aofloup kóste hure tot ’t veur de deilnummmers oetzunderlek lèsteg waor gewees um de zinne vaan ’t dictee in 7 versjèllende Limburgse dialekte foutloes op te sjrieve. Eder dialek heet jummers weer zien eige spellingseigenaordeghede.

Vaandao tot veer us noe get anders höbbe laote invalle. In plaots vaan ’n dictee goon veer – Veldeke en De Limburger – noe ‘ne Limburgse Taolquiz organisere. Wie zuut dat oet? In ’t naojaor kump ‘nen oproop in de gezèt te stoon um deil te numme aon de veurrunde die me online kint invölle. Wee mètdeit krijg ’n deil miekäösvraoge te leze boe-op me binne e paar seconde moot antwoorde. Um e veurbeeld te geve (‘t is mer e veurbeeld):

• Wat is ‘ne garepaap?
  • een vlinder
  • een libel
  • een kooktoestel

Wee al die vraoge ’t bèste, dat wèlt zègke mèt de minste foute beantwoordt, maag mètdoen aon de finale die op dinsdag 8 oktober 2019 in Sittard zal weure gehawwe. Dao kriege de finaliste obbenuits ’n serie miekäösvraoge geprizzenteerd die ze mèt behölp vaan hunne mobielen tèllefoon of mèt e stumkeske kinne beantwoorde. D’n oetslaag weurt medein op e groet sjerm geprojecteerd en nao aofloup kump de winner vaanzelf oet de bös.

Dus: es geer mèt wèlt doen, hawt daan de gezèt (gedrök of digitaol) in de gate of ouch euze website en sociaol media (Facebook en Twitter) en daan komp geer in de loup vaan september vaanzelf de link tege nao de vraogelies vaan de veurrunde vaan de Limburgse Taolquiz 2019. Dao zien ouch nog sjoen prijze mèt te winne!