Limburgstaolegen teks vaan Jelske’s Dialectric-nómmer “Weer & Wind”

Geer höb ’t al in de gezèt kinne leze: de Limburgstaolege popmeziek heet e nui genre debij. Jelske introduceert same mèt producer huub Holtman ’t dialectric nómmer “Weer & Wind”. Dialectric is elektronische dialekmeziek en is ’t rizzeltaor vaan de samewèrking tösse dees twie Limburgse artieste. “Weer & Wind” is de ierste oetgaof vaan de later dit jaor te versjijne EP. “Weer & Wind” is te zien op YouTube en te beluustere op Spotify via d’n artoestepagina vaan Jelske. Jelske waor zoe vruntelek us de Limburgsen teks vaan “Weer & Wind” touw te sjikke. Dee geit es volg:

Weer & Wind

Ut is weer en wind
Ut is weer en wind
Raegen op mich
Raegen euvervelt mich

Ut is weer en wind
Ut is weer en wind
Raegen door dich
Raegen euverwhelmed mich

Ut is weer en wind
Ut is weer en wind
Gaef ut een kans
Wievuul kanse dan

Gaef ut een kans
wievuul kanse
Gaef ut een kans
wievuul kanse

Ut is weer en wind
Ut is weer en wind
Kanse zat dan
Kwetse zat dan

Ut is weer windstil,
ut is weer windstil,
ut is weer windstil
……windstil

Es verklaoring voog Jelske dao nog aon touw tot zoewel “weer” es “kanse” op twie menere kint weure geleze. “Weer” is zoewel ’t metereologisch weer es ouch “alweer”. En “kanse” kint in ’t Venloos ouch es “kan se” (kun je) geleze weure. ’t Woord “euverwhelmed” is geliend oet ’t Ingels meh daan veur de helf “verlimburgs”.

Jelske Wilmer – artiestenaom Jelske – studeerde aof aon ’t Conservatorium Mestreech en brach in 2011 häör debuutalbum “Breeze” oet. In 2019 versjeen ’t Ingelstaoleg album “On my way”. Daoneve wèrkde ze mèt aon versjèllende meziekprojekte zoe wie “Venlo Heartbeat” same mèt Mike Roelofs en Baer Traa en “Kermis in Venlo” mèt ’t nómmer “Zalig Kermis”.

Holtman brach in 2016 zien ierste soloalbum oet. Sinds deen tied hèlt heer ziech bezig mèt synths en samplers soundscapes. Hei woort zien intrèsse gewèk um ziech ouch op ’t producere vaan meziek te riechte. Holtman produceerde same mèt Niels Koster vaan Oakland Studio’s de meziek vaan “Weer & Wind” en verzörgde de complete productie vaan de videoclip.

Jelske kaom Huub tege tijdens ’t projek “Kersmis in Venlo”. Venlose artieste sjreve keersnómmers in ’t dialek en naome die mèt professioneel muzikante en producer Leon Bartels op. Dat projek prikkelde Jelske um weer dialektekste te sjrieve.  Veur d’n elektronische finish zeukde ze de samewèrking op mèt Huub Holtman.

“ ’t Allerierste nómmer wat iech oets sjreef waor “Stedje van de leefde”, e vasteleovendsnómmer wat iech in 2003 same mèt Cielke Sijben zóng. ’t Is sjoen tot iech oet die tradidie vaan dialekmeziek noe same mèt Huub ‘ner gans nuie weeg in kin sloon. Zoonder zien hölp, passie en expertise waor dat noet gelök”. 

← Ga terug