Loestere nao Zittesje tekste, proza en poëzie

Loestere.nl is de naam van de website wo-op de tekste van versjillende sjrievesj, proza en poëzie, in ‘t Zittesj dialek, te beloestere zeen. De tekste kènne door de sjriever zelf, mer ouch door emes angesj veurgedrage zeen.

Het initiatief veur genuimde site kump van Ellen Richter. ‘t Is gebaore in Zitterd, mer woont al jaore in ‘t Zuid-Hollandse Zoetermeer. Ellen koum op ‘t idee van loestere.nl naodat ze kènnis haw gemaak mit de website luusteren.nl. Op dees website zeen verhaole en gedichter in ‘t Achterhoeks dialek te beloestere. Mit de website wilt Ellen veural awwere in deze coronatied get aafleijing, treus en tiedverdrief bijje. Veer kènne aevel vermelje dat ouch veur jóngere loesteraesj get te belaeve vilt.

Veurluipig beperk ‘t zich tot sjrievesj in ‘t Zittesj, de gemeinte wo ‘t vandaan kump, mer ‘t sjlut neit oet dat later ouch anger Limburgse dialekte ein plaatsj kriege op de site. Bekènde Zittesje sjrievesj wie  Lizette Colaris, Phil Schaeken en John Hertogh höbbe al mitwirking verleend en ouch Toon Roumen, vaste columnist op de website van Veldeke, haet al versjillende van zien columns ingesjpraoke.

Ein en anger is besjlis de muite van ‘t beloestere waerd. Klik hie óm daomit te beginne.