LVK en Veldeke goon samewèrke

Stiechting LVK en Stiechting Veldeke goon samewèrke door leedsjesjrijvers, die mètdinge veur ’t Limburgs Vastelaovesleedsjes Konkoers, de meugelekheid te beeje um tekste te laote controlere op ’n zjuste sjriefwijs in ’t plaotselek dialek. Veldeke kint 10 regionaol kring door de ganse provincie mèt lui die de gesjreve taol vaan ’t dialek good beheerse. Es dao geine krink is in de stad of dörp vaan boe-oet e leed gesjreve weurt, daan kint ouch e  beroop weure gedoon op de streektaolfunctionaris vaan ’t Hoes veur de Kunste Limburg. Daomèt weurt de ganse provincie aofgedèk.

Joep Verbugt, veurzitter Stiechting LVK is verhäög mèt de samewèrking. “Veer oontvaange veur ’t LVK jaorleks e paar hoonderd leedsjes en ’t vèlt us op tot dao väöl versjèlle zien in de gebruukde sjriefwijs vaan ’t plaotselek dialek. Noe liekent miech dat ouch lèsteg este neet daogeleks in ’t dialek sjrijfs en daorum is ’t plezereg es daoveur advies kint weure gevraog. ’n Zjuste sjriefwijs vaan ’t eige plaotselek dialek dreug bij aon de kwaliteit vaan e leedsje en hèlt eus Limburgse taol hoeg. Tot Veldeke dezen deens kosteloes aonbeejt, maak d’n dörpel um ‘ne teks veur te lègke lieger.”

Veldeke beharteg al mie es 90 jaor ’t belaank vaan de Limburgse taol. Volgens veurzitter Christine van Basten pas de hölp aon leedsjesjrijvers bij de missie vaan de Stiechting: “Veer zètte us in veur ’t behaajd en bevordere vaan de Limburgse taol. Eus taol is oonlosmakelek verboonde mèt eus Limburgse volkscultuur en dao pas ’t LVK good bij es groetste vastelaovesleedsjes konkoers vaan Limburg. Dus veer zien blij tot eus kring hei aon ’n bijdrage kinne lievere.

Leedsjessjrijvers kinne hun verzeuk um d’n teks vrijblievend te laote controlere, indene bij de plaotseleke krink (zuug op deze website veur de mailadresse). Es dao eine kontakpersoen bij de plaotseleke krink bekind is, kint d’n teks weure touwgesjik. De tekste zalle vertrouwelek behandeld weure en neet mèt andere weure gedeild. D’n teks weurt veurzeen vaan tips veur ’n ander sjriefwijs in ’t plaotselek dialek en trök gesjik nao d’n insjikker. ‘t Is daan aon de sjrijver of heer/zie de advieze euvernump. Aon de adviesaonvraog zien gein koste verboonde. Is dao geine plaotseleke krink vaan Veldeke te vinde, daan kint ’t verzeuk weure ingedeend bij de redactie vaan deze website of bij de streektaolfunctionaris vaan ’t Hoes veur de Kunste.

← Ga terug