Marion Steeghs zingk in ’t Americaons dialek
’t Leedsje “Stille Vlinder” steit al ’n tiedsje hoeg in de Limbo Top 10 vaan Henk Hover op L1 Radio. ’t Is gesjreve en gezoonge door Marion Steeghs (1980) oet America, boe ouch Rowwen Hèze zienen thoesbasis heet. Meh Marion bringk ’n hiel eige geluid. Häöre meziek is melancholisch en poëtisch vaan aard en de sfeer vaan teks en meziek vleuje naodloes inein euver.
Zie sjrijif in ’t Limburgs, ’t dialek vaan häör geboortedörp America. Ze zeet dao-euver: “Zingen en tekste schrieve in mien Limburgs dialect, de taal die ut dichtste beej meej leet. Juust durrum vult een ander zich dur ok mej verbonge. En raakt ut.”
Debuutalbum Nachtvogel
Same mèt componis en pianis Egbert Derix sjreef Marion aon häör debuutalbum Nachtvogel. Mèt de muzikante Egbert Derix, Norbert Leurs, Ivo Rouschop, Leo Janssen, Yvonne van de Pol en Marie-José Didderen, heet ze in de studio vaan Niels Koster in Kessel ‘t album opgenome.
Egbert Derix (1969) is aofkomsteg oet Horst en is geinen oonbekinde in de meziekwereld. Heer wèrkde oonder mie same mèt Bendik Hofseth, Eric Vloeimans, Iain Matthews, Supertramp saxofonis John Helliwell, acteur Huub Stapel, Margriet Sjoerdsma en Fish. Ouch sjreef en späölde heer de soundtrack veur de BNN-Vara documentaire ‘Nao ’t Zuuje euver Lex Uiting.
Marion Steeghs debuutalbum is te beluustere via Spotify en op Youtube steit ‘ne clip vaan ’t nómmer “Stille vlinder” vaan diezelfde CD. Geer kint dat hei beluustere.
