Mestreechs Kwartètspeul

Veldeke Krink Mestreech heet get nuits in de kiekoet: e kwartètspeul mèt allemaol typische Mestreechse wäörd en gezègdes, verdeild euver 14 cattegorieje wie ‘t Lief, Aon Taofel, De kemissies en De bieste. Wie de krink op ziene website sjrijf: “Veur eur eige. Es verjaordaagskedo veur eur (klein)keend. Of veur eur Hollandse femilie, vrun of collega’s um ze get Mestreechse wäörd te liere.”

En veur wee dat nog neet genóg aonbeveling is: “Ideaol um de werm zomeraovende of deen eine regenechtegen daag um te kriege op vekantie! Of zoetot eur (klein)kinder ziech neet hove te vervele achterin d’n oto op weeg nao eur vekantiebestumming. En zelfs in de wachrij op ‘t vleegveld kint g’r ‘t speule.”

Kort gezag; ‘n ideaol speul veur deze zomer! Zeet gaw debij, want ‘t enthousiasme is groet, meh de veurraod beperk.  ‘t Kwartètspeul kós € 8,50 (exclusief versjikkoste) en is te bestèlle  op de website vaan Veldeke Krink Mestreech.

‘t Kwartètspeul is tot stand gekoume in samewèrking mèt docentenorganisatie Levende Taole Limburgs en mèt de Veldeke Krink Heerle.

← Ga terug