Mestreechsen dialekkinner Flor Aarts gestorve

Op 29 juni 2021 is Flor Aarts gestorve. Heer waor 86 jaor. Flor Aarts waor es hoeglieraar verboonde aan de universiteite vaan Nimwege, Bristol en Londe, boe heer ziech bezeg heelt met de Ingelse taol- en lètterkunde. Nao zien pensionering heet heer ziech touwgelag op de studie vaan de Mestreechter taol. Veur de Veldeke Krink Mestreech sjreef heer versjeie beuk, boe-oonder:

  • Eus Moojertaol, ’n besjrijving vaan ’t dialek vaan Mestreech
  • Dictionairke vaan ’t Mestreechs, mèt mie es doezend Mestreechse wäörd, oetdrökkinge en gezègdes
  • Liergaank Mestreechs, ‘ne cursus euver de Mestreechter taol
  • ’t Etymologisch dictionairke vaan ’t Mestreechs, euver boe de Mestreechse wäörd vaandan koume
  • Boekèt Mestreechs, ’n blomlezing oet de Mestreechse dialekliteratuur.

Daoneve publiceerde heer tot twie kier touw ‘nen Taolkelender boe-in veur 365 daog vraoge en antwoorde euver de sjrijfwijs of oetspraok vaan de Mestreechs taol waore opgenomen.

Begin vaan dit jaor kraog Flor Aarts oet han vaan börgemeisterse Annemarie Penn-te Strake nog ’t Teike vaan Verdeenste vaan de stad Mestreech veur zien bemeujenis veur ’t behaajd vaan de Mestreechter taol. Ouch Veldeke is Flor Aarts bezunder erkintelek veur zienen enthousiaste en deskundegen inzat.

← Ga terug