Minister Lilianne Ploumen euver Mestreechs praote

Lilianne Ploumen is gebore in Mestreech en al reis ze de ganse wereld euver, Mestreech en de Mestreechter taol höbbe nog altied e bezunder pläötske in häör hart. In ‘t tèllevisieprogram “Aovendgaste” vaan L1 TV vaan 4 jannewarie 2017 zeet ze dao ‘t volgende euver

“Iech praot tege mien kinder altied Mestreechs. Die zien in Rotterdam en Amsterdam gebore, die praote ’t ouch neet meh ze verstoon ’t wel. Meh iech kós ’t neet euver mien hart verkriege um – wie veer zègke – ”Hollands” tege ze te praote wie ze klein waore. En jeh, este in Mestreech gebore bis, blijfste altied ‘ne Mestreechteneer. Dat is ouch ech wel get um trots op te zien. Veer höbbe eus eige taol, eus eige leedsjes, veer höbbe toch ouch eus eige meneer vaan mèt ein umgoon. Toch allemaol zjus e bitsje harteleker es soms in ander deile vaan ’t land, dus iech veul miech altied wel Mestreechteneer. ‘t Is toch anders este in Maarn of Doorn  gebore bis. Ouch leuk meh veer höbbe toch get eiges. ‘t Is neet allein de stad meh ouch ‘t landsjap. Dat kin iech nog wel ins misse bij us dao bove. Al die slootjes en dat platte. Dat is netuurlek hiel anders in Limburg. Miene pap dee kump oet Noorbeek en dat is netuurlek ‘t sjoenste landsjap wat d’r is.” 

Lilianne Ploumen is Minister vaan Boetelandsen Handel en Oontwikkelingssamewèrking in ‘t Kabinèt Rutte. ‘t Complete interview is te bekieke en te beluustere op de website vaan L1 TV (klik hei). De geciteerde passage begint nao 10.15 menute.

← Ga terug