Nachtegaalreeks euver Limburgstaolege literatuur

In ’t veurjaor vaan 2021 versjijne de ierste deilkes vaan de Nachtegaalreeks, ’n gezameleke oetgaof vaan Veldeke en LGOG euver Limburgstaolege sjrijvers en diechters. De serie monografieje, boe-in ederskier ‘ne Limburgstaolegen auteur of ’n thema oetveureg beleech weurt, slut aon bij ’t e paar jaor geleie versjene standaardwerk “Geschiedenis van de literatuur in Limburg”. Allewel de literatuur in ’t Limburgs structurelen aondach kraog, bleef ’t aondeil devaan relatief besjeie. De Nachtegaalreeks is ouch opgezat um in die lacuun te veurzien.

De serie start mèt ’n dóbbeloetgaof um ’t twieledeg karakter devaan te oonderstriepe. Deil 1, mèt es titel “Den duvel van de middig goof ós vriej” behandelt de Remundsen diechter Paul van der Goor en is gesjreve door Pim Thielen. Deil 2 hèt “Gekheid, mer neet boete de schraom” euver de carnavalsbuut in Limburg es literair versjijnsel,  en is gesjreve door Guus Urlings.

Eder deil besteit oet ’n essay boe-in de achtergrun vaan de behandelden auteur of ’t behandelde thema weure touwgeliech én ’n blomlezing oet ’t oeuvre of ‘t thema. ’t Essay is in ’t Nederlands gestèld um d’n teks ouch begriepelek te hawwe veur lezers die ’t Limburgs neet mechteg zien. De blomlezing bevat tekste in d’n originele Limburgse taol mèt ’n vertaoling daan wel ’n touwliechting in ’t Nederlands. ’t Doel vaan de reeks is de diversiteit en kwaliteit vaan literatuur in ’t Limburgs veur e groeter publiek vaan lezers dudelek te make.

De initiatiefnummers Veldeke en LGOG höbbe mèt succes alles in ’t werk gestèld um de verkouppries veur eder deil op € 10,00 te hawwe. Dao kump ouch ’n meugelekheid um veuraof in te teikene of ’n abonnemint op de reeks te numme. In veurbereiing zien deilkes euver d’n diechter Wim Kuipers oet Maasniel, euver de revuetekste vaan Frans Boermans oet Venlo, euver romansjrijver Léon Veugen en auteur/diechter Pol Brounts, allebei oet Mestreech.