Neerlandistiek besteit aondach aon de Limburgse Nachtegaalreeks

De website vaan Neerlandistiek, ein vaan de toenaongevende informatiebronne euver Nederlandse taol en literatuur, besteit oetgebreid aondach aon de Limburgse Nachtegaalreeks. In de Nachtegaalreeks, ’n initiatief vaan Veldeke en LGOG, versjijne de koumende jaore successievelek monografieje boe-in Limburgstaolege auteurs en Limburgstaolege thema’s weure behandeld en touwgeliech.

Die touwliechting gebäört in ’t Nederlands zoetot ouch neet-Limburgers touwgaank kriege tot de literair perelkes die de Limburgse literatuur in hoes heet. Ouch de limburgstaolege tekste, proza en poézie, weure veurzeen vaan ’n Nederlandse vertaoling.

Daorum is ’t vaan belaank tot noe ouch boete Limburg aondach weurt gevraog veur dees bezunder oetgaof. Geer kint ’t online artikel van Neerlandstiek hei leze.

De ierste twie deilkes vaan de Nachtegaalreeks zien recentelek geprizzenteerd. Deil 1 (gesjreve door Pim Thielen) bevat ’n ode aon de poëzie vaan Remundeneer Paul van der Goor, dee e klein meh fien oeuvre heet gepubliceerd in ’t daomaoleg tiedsjrif “Veldeke”. Deil 2 (gesjreve door Guus Urlings) is thematisch vaan opzat en bevat ’n historisch euverziech en blomlezing vaan tekste oet de rieke traditie vaan de Limburgse buuttereedners.

Es geer deilkes vaan de Nachtegaalreeks wèlt bestèlle, kint geer daoveur hei terech.