Niej kinderbukske in ‘t Venloos dialek

Naeve de kleure die we hebbe veur de waersverwachting en de coronabesmettinge kriege we ouk nog de code roeëd veur ’t Limburgs dialek. Det is de kop baove ’t artikel van Leonie Cornips in de Limburger van 10 oktober.

Kern van ’t verhaol is det kinder steeds flotter en dökker euvergaon op ’t spraeke van de Nederlandse taal. En det daodoor ’t spraeke van dialek in gevaor kump. De veurdeile van twieëtaligheid zien al dökker beleech. De veurgestelde actie is ’t oetbringe van veurlaesbeuk, kinderleedjes vertale nao dialek en mieërtaligheid in peuterspeulzale.

Laot juus op daezelfde zaoterdaag de Stichting Kinderfeesten Venlo ’n bukske prisentere det beej gelaegeheid van eur 70-jäörig bestaon wuurt oetgegaeve. De stichting zörg d’r veur det in Venlo de vief  jäörlikse aevenemente veur de kinder gehalde kinne waere: de palmhöltjesoptoch, de keuningsoptoch, Sintermerte, Sinterklaos en Allerkinder. Um die activiteite nog ens in ’t leech te zitte, hebbe ze Renée Vercoulen gevraog um tekste te schrieve en Leon Peeters teikeninge te make.  ’t Bukske ’Kinderfeeste mit Cielke en Baer’ is ‘t indresultaat. ’n Kleurriek bukske in de veerkante vorm die we kinne en met de óndertösse bekinde Venlonaerkes Cielke en Baer in de houfrol. Zeej viere alle kinderfeeste mei en det wuurd op ’n kwante wies in waord en beeld waergegaeve.

‘t Bukske is mei meugelik gemak mit óndersteuning van de Stichting Henric van Veldeke, die d’r gruuets op is det ze ’n beejdrage kin levere aan ’t laeventig halde van ’t dialek. De (groeët-)elders en lierkrachte zien noow aan zet um te zörge det de kinder dees beuk laeze of veurgelaeze kriege.

Vuuel laesplezeer wins ik óg.
Gerard van Gestel

’t Bukske van Cielke en Baer is veur € 9,95 te koup beej o.a. de volgende winkels:

Venlo
– Bookwinkel Koops (Klaosstraot)
– Slegterie Schreinemachers (Gashoèsstraot)
– Snoepwinkel Truuske (Parade)
– ‘t Holtschöpke (Joeëdestraot)
– Beej Benders (Nolensplein)
– Jumbo Benders (Venlo)
– Gebr. Van den Broek (Maagdenbergweg)

Bliërick
– Bruna (Kloësterstraot)
– Primera (De Wieën)
– Berden Kindermode

← Ga terug