Nui aofdeiling veur Veldeke Belsj Limburg

In Lonerland is ’n nui aofdeiling vaan Veldeke Belsj Limburg in opriechting. Lonerland ligke ten zuide vaan Hasselt en umvat oondermie de plaotse Borgloon, Heers, Wellen en Alken. Lonerland weurt de zèsde aofdeiling vaan Veldeke Belsj Limburg neve die vaan Hasselt, Genk, As, Maasland en Dommelland. Op 10 miert voont in dat kader in Alken ‘nen dialekaovendplaots dee oonverwach väöl bezeukers trok.

 De zaol vaan ’t Sint Jorisheem waor mer zjus groet genóg um de 170 belangstèllende te herberge. De bezeukers kraoge e gevarieerd program geprizzenteerd mèt veurdrachte, sketches en meziek, allemaol in ’t dialek vaan Belsj Limburg netuurlek. De Belzje gezèt Het Belang van Limburg doog oetgebreid verslaag vaan deen aovend. Wee dat wèlt naoleze kin hei-op klikke.

Zjus wie Veldeke Limburg in Nederland zèt ouch Veldeke Belsj Limburg ziech in veur ’t gebruuk en behaajd vaan eus taoleg erfgood. In Belsj ligk dat nog get meujeleker es bij us umtot de status vaan ‘t dialek dao neet zoe hoeg is. Meh ’t is wie ze in Alken zègke: Doewe is gèn sjoiner taol es dei van os!

← Ga terug