Nui book euver Henric van Veldeke in ‘t Duits en ‘t Frans

De belaankstèlling veur euze naomgever Henric van Veldeke beperk ziech neet tot de provincie Limburg. Dat is ouch neet zoe vreemp es me bedink tot heer gebore is in wat veer noe Belsj neume en e groet deil van zie leve gewèrk heet in wat allewijl Duitsland hèt. Es dao e nui book versjijnt euver de Middeliewsen diechter kint ’t dus gebäöre tot de taol boe-in dat gesjreve is, in ’t Duits en ’t Frans is gestèld. Umtot veer uuch gere op de huugde wèlle hawwe vaan de lèste oontwikkelinge op ’t gebeed vaan kinnes euver Veldeke, wèlle veer uuch ’t versjijne vaan dit book neet oonthawwe.

Tot d’n teks ouch in ’t Frans besjikbaor is, kump umtot dit book e gevolg is vaan e symposium euver Henric van Veldeke wat aofgeloupe jannewarie in Paries heet plaotsgevoonde. De bijdrage aon dat symposium zien noe geboondeld in dit book. Dao-in kump oonder mie tot uting wie versjèllend me in de loup vaan iewe tege d’n diechter Veldeke heet aongekeke. Versjèllende lede vaan eus vereineging höbbe indertied mètgeholpe um informatie te verzamele veur d’n inhaajd vaan dit artikel. En de vereineging Veldeke krijg daan ouch ’n plaots in ’t book.

Vaanwege corona heet de introductie vaan ’t book neet kinne plaotsvinde wie dat veurzeen waor. Meh de planne um dat te doen in de vörm vaan e symposium wat in Hasselt gehawwe zal weure, stoon nog euvereind veur zoe gaw es de pandemie dat touwsteit. D’n titel vaan ’t book is:

  • Von Troja Nach Thüringen Heinrichs von Veldeke Eneas/De Troie en Thuringe : l’Eneas de Heinrich von Veldeke
  • De redacteure zien: Peter Andersen, Patrick Del Duca en Delphine Pasques

’t Book kos € 37,00 en kint bestèld weure via de website vaan de oetgeverij L’Harmattan in Paries.

Wijer kinne veer nog melle tot recentelek ouch nog ‘ne websikte euver Henric van Veldeke in ’t Duits is geopend. Dee website kint geer raodplege door hei te klikke.

← Ga terug