Nui Radiorubriek: Plat-eweg Platbook

In ’t L1 radioprogram Plat-eweg vaan Henk Hover zalle de koumenden tied neet allein leedsjes te beluustere zien meh ouch Limburgstaolege gediechte en verhaole. Daoveur zien in de studio opnaomes gemaak vaan 21 Limburgse sjrijvers die hun eige gediechte of verhaole veur de microfoon veurlaoze. De sjrijvers zien geselecteerd oet Platbook, ’nen haafjaorlekse boondel dee sinds 10 jaor weurt oetgegeve door Oetgeverij TIC in opdrach vaan ’t Hoes veur de Kunste in samewèrking mèt Veldeke en de stiechting LiLiLi. De nui rubriek geit ‘Plat-eweg Platbook’ heite.

De tekste zien gesjreve in versjèllende variante vaan de Limburgse taol. Eder Platbook kint ’n eige thema en ‘nen eige redacteur. Nao bekindmaking vaan ’t thema weure sjrijvers oetgenudeg um proza of poëzie roond dat thema in te sjikke. De reeks is e groet succes, zoe bliek oet ’t groete aontal inzendinge boe-oet ’n selectie gemaak weurt door d’n eindredacteur vaan deens. Oondertösse versjene al 20 edities vaan Platbook en is editie 21, onder eindredactie vaan député Ger Koopmans en de Weertse wèthawwer Geert Gabriëls in de maak.

Belaank vaan gesjreve Limburgs

Plat-eweg programmeker Henk Hover zeet dao-euver: “Neve aon leedsjes vin iech ’t belaankriek um ouch aondach te besteie aon ’t gesjreve Limburgs. Zjus wie in de meziek koume ouch Limburgse verhaole en gediechte dèks directer bij diech binne en wete ze te rake, of ’t noe um serieus of humoristische tekste geit, ’t blijf toch dien moojerstaol.”

Hover waor aongenaom verras door de kwaliteit vaan de veurgeleze gediechte en verhaole. “Iech hoop tot dees wekelekse rubriek de lui aonzèt um ouch ins literatuur in de Limburgse taol te goon leze. Veurgeleze weure maak d’n dörpel mesjiens get lieger veur lui die ’t lèsteg vinde um Limburgs te leze. Mienen tip: perbeer ’t gewoen ‘ns, de zals mèrke tot ’t diech eder kier beter aof geit.”

Edere zaoterdag en maondag te beluustere

‘Plat-eweg Platbook’ is edere zaoterdag te hure tösse 13.00 en 16.00 oor via L1 Radio, en ouch wereldwied via www.plateweg.nl . Op maondaaovend tösse 19.00 en 20.00 is ’n herhaoling vaan ’t eurke boe-in ouch de Plat-eweg-Platbook rubriek te hure zal zien. De ierste oetzending is op zaoterdag 18 mei. Daan zal Annie Schreuders-Derks veurleze oet eige werk.

 

 

← Ga terug