Nui statute en nuie sikkertaris veur Veldeke Limburg
Op 23 november kaome de bestuurders vaan de lokaol Veldeke Kring in Remund bijein veur de twiede algemein Lede vergadering vaan 2023. De vergadering bestoont oet twie deile: ’t ierste deil waor gerizzerveerd veur de aonpassing vaan de statute vaan de vereineging, die nudeg waor geworde door veranderde wètgeving. In ’t twiede deil kaome de gebrukeleke oonderdeile aon de orde mèt trökkieke nao de aofgeloupe maonde en veuroetkieke nao de koumenden tied.
Nui Statute good gekäörd
Nao dèks te zien oetgestèld is noe toch e besluut gevalle euver de nui Statute vaan Veldeke Limburg. Punt vaan discussie boe-euver de kringbesture ’t mer neet eins kóste weure waor de stumverhawding tösse de 10 aongeslote kring. Umtot dao kring zien mèt hoonderde lede (zoewie Mestreech) meh ouch ‘ne krink mèt tientalle lede (Um Mamelis) waor de vraog wie dat versjèl tot oetdrökking mós koume bij ’n stumming binne de Algemein Lede Vergadering. Sommege lede voonte tot ’t solidariteitsbeginsel veurop mós stoon boebij edere krink éin stum zouw kriege, andere voonte tot wee de mieste lede had ouch de mieste stumme had in te bringe. Oeteindelek heet me ziech gevoonde in ’n staffel, boebij eder (begin vaan) 100 lede ein stum oplievert. Boevaan akte.
Thijs Peeters nuie sikkertaris Provinciaol bestuur
Tijdens het tweede deel van de vergadering is Thijs Peeters beneump tot sikkertaris vaan ’t provinciaol bestuur. Thijs (71) is gebore in Weert en opgegreujd in Baexem. Vaanaof zien 18e heet heer bove de riviere gewoend, veur studie, veur militairen deens en veur zie werk in de otomobielbranche. Nao trökkoms in Limburg heet heer 6 jaor in de provincie gewoend, is getrouwd mèt zien vrouw die oet Eys kaom en heet mèt häor drei kinder gekrege. Daonao heet heer nao eige zègke “gezworve” door Nederland en ’n aontal Europese len. Vaanaof 2001 heet heer ziech oeteindelek definitief in Limburg gevesteg en wel in Mustergeleen. Noe heer mèt pensioen is wèlt heer ziech inzètte veur ’t behaajd vaan de Limburgse taol. Thijs woort bij acclamatie beneump en metein aon ’t werk gezat achter de bestuurstaofel.
