Nuie single vaan Paul Weelen: Bezuk is jraad wie visj

Ouch in 2020 bringk Paul Weelen drei singles oet. D’n ierste daovaan , mèt es titel Bezuk is jraad wie visj, is oonder corona umstandeghede opgenome en gemix. Paul neumt ’t zelf  ‘nen anticorona blues, oonder ’t motto ’t bèste medicijn tege slechte zin is gooj zin.

Zjus wie de single Alles wat iech wil oet 2019 is Bezuk is jraad wie visj e jazzy nómmer. Paul Weelen perbeert deze crisitied mèt get humor te verliechte en zingk euver wat noe zjus neet maag: op bezeuk goon en bezeuk oontvaange. Zeker es femilie kump, de kinder vaan femilie en oeteindelek ouch nog de sjoenma, daan kinne de spanninge binneshoes wel ins oploupe.

De zenger oet Kèrkraoj begós zien carrière mèt de gróp Weerwaas in de jaore ’80 vaan de veurege iew. Mèt de volgende gróppe Ramsj en Oes de Ef maakde heer dudelek tot heer wijer veural es popmuzikant of zelfs rocker gezeen wouw weure. Nao e paar suksèsse bij L1 in de Limbo top 10 zoe’n èlf jaor geleie mèt oonder mie Zommer in diene kop en Kans te miech vertselle zörgde de digitaol verandering veur zoe’nen inbreuk op de meneer vaan meziek make tot heer de leedsjes zelf oetbrach op ziene website. Dat deit heer oondertösse perceis 11 jaor mèt eder week e nui leedsje. Dat beteikent tot mie es 500 leedsjes via ziene website zien gepubliceerd, boevaan nog ummertouw e groet deil te beluustere vèlt. De website heet maondeleks tösse de 500 en 600 luustereers.

In 2018 besloot heer bij Marlstone weer e paar compleet door muzikante ingespäólde leedsjes op te numme. In 2020 is dao noe e vervolg op gekoume. De video vaan Bezuk is jraad wie visj kint geer hei op Youtube bekieke.

Veurluipes is ’t eind vaan de meziekcarrière vaan paul Weelen neet in ziech. Dao zalle nog e paar hoonderd leedsjes op de website koume te stoon, zoe zien de veuroetziechte, mèt zoe aof en touw ‘nen echte single.