Nuie single vaan Paul Weelen: Leef breuzelsjaos

Oonvermeujbaar trakteert Paul Weelen us bekans daogeleks op gediechte en leedsjes in zie sjoen Kirchräöds dialek. Deze kier is heer weer ins de studio vaan Marlstone ingedoke um nao boete te koume mèt ‘n oonvervals countrynómmer: Leef Breuzelsjaos. Breuzelsjaos beteikent zoe väöl wie mopperkoont. Meh daan wel ‘n leef mopperkoont en geine wappie of relsjöpper.

Door te keze veur de countrymeziek en te zinge in ’t Kirchräödsj combineert Paul zien geboorteland Canada mèt zien leefde veur Kèrkraoj. Twelf jaor geleie begös heer mèt eder week e leedsje op te numme in zien eige studio en dat op ziene website te plaotse. Dat beteikent tot oondertösse mie es 500 leedsjes op die meneer gepubliceerd zien, boevaan e groet deil nog ummer te beluustere vèlt. De website heet edere maond tösse de 500 en 600 luustereers.

De video vaan ’t nómmer Leef Breuzelsjaos is te zien op YouTube, mèt beelde vaan echte kojbojs en  de klaank vaan ‘n steel guitar. Mick Gravée begeleit häöm op drums, Rick Maessen op bas en Pieter Vermeulen op pedal steel en mie gitare. De productie stoont oonder leiing vaan Joep Servais.

← Ga terug