Nuie veurzitter én nuie sikkertaris veur Veldeke Limburg

Christine van Basten-Boddin, de huidege börgemeisterse vaan Beek, is op dinsdag 20 fibberwarie door de Algemein Ledevergadering vaan Veldeke Limburg beneump tot nuie veurzitter vaan de vereineging. In ein meujte door woort Ron de Louw beneump es nuie sikkertaris. De nuie veurzitter en sikkertaris kinne ziech good en zien al op ein ingespäöld want boe Christine börgemeisterse is, is Ron gemeintesikkertaris.

Vice-veurzitter Lei Heijenrath reumde de kwaliteite en de ambities van de nui bestuurslede zoe wie häöm die gebleke waore bij de oriënterende gesprekke die heer d’n aofgeloupen tied mèt hun geveurd had. Daobij waore ouch de speerpunte die Veldeke ziech veur de koumende jaore gestèld heet aon de orde gekoume: verjonging, feminisering, d’n inzat vaan sociaal media en samewèrking mèt ander organisaties die de Limburgse taol wèlle bevordere.

Christine van Basten-Boddin benaodrökde in häör ierste touwspraok tot de vergadering tot ze de kontakte mèt de lokaal Veldeke kring hiel belaankriek vint en tot ze vaan plan is binnekort same mèt de sikkertaris bij alle kring op  bezeuk te goon um te hure wat dao späölt en wat Veldeke Limburg in dat verband kint beteikene. Wijer leet ze blieke ziech mèt vol euvertuiging te goon inzètte veur ’t realisere vaan de doele die Veldeke veur ouge heet.

De vergadering stumde bij acclamatie en applaus veur de beneuming vaan allebei de kandidate. Lei Heijenrath had nog ’n poëtische verrassing: heer declameerde e zelf gemaak acrostichon op de veurnaom vaan de nuie veurzitter. D’n teks daovaan is in ’t Kèrkraojs es volg:

Welkom Christine

C ommunicere dunt vuur in ’t plat
H offe dat nog lang tse praktizere
R oane doarum jidderenne aa dat
I n alle sjteë en dörper mit Veldeke te orjanisere

S jtoots jees doe ós doa in vuur
T reens mit charme óp en dreëgs de vaan
I ng sjtaatse dame mit alluur
N ems Veldeke bij de hank, maachs ’t woar
E n sjtees óp de bres vuur ós moddersjproach

← Ga terug