Nuien Taolkelender vaan ‘t Mestreechs

Nao ’t succes vaan Liergaank Mestreechs gief Flor Aarts in november ‘ne nuien Taolkelender vaan ’t Mestreechs oet. Oet wat veur taol kump ’t Mestreechs wäördsje ‘benkelek’? En wat beteikent de oetdrökking “Ziech de kloete sjore’? ’t Antwoord op de ierste vraog: ’t Aokes. ’t Antwoord op de twiede vraog: niks doen. Dees en ander weetsjes stoon in d’n Taolkelender vaan ’t Mestreechs vaan Flor Aarts (86), dee eigelek professor Ingelse Literatuur aon de Radboud Universiteit in Nimwege waor. Nao zien pensionering heet heer ziech compleet op ’t Mestreechs dialek touwgelag. Heer sjreef dao versjèllende beuk euver, zoewie ’t wetensjappelek oonderzeuk ‘The dialect of Maastricht’, ’t Verhaol vaan eus Taol’ en ‘Liergaank Mestreechs’, e cursusbook um Mestreechs te liere spreke en sjrieve.

Deze kier heet Flor Aarts gekoze veur e frivool drökwerk: ‘ne kelender mèt 365 taoltips, vraoge en weetsjes euver ’t Mestreechs dialek. Ze höbbe betrèkking op de grammatica, de spelling, dn oersprunk en (de beteikenis vaan) gezègdes. Beveurbeeld: Wie douf kint ‘ne Mestreechteneer zien? Zoe douf wie ‘ne pot zoonder oere. De antwoorde stoon ederskier op d’n achterkant. Dao zien 1.500 exemplare gedrök en al e paar hoonderd zien gerizzerveerd. D’n opbrings is veur e good doel: ‘t Jonge brein onderzoeksfonds Limburg. Dit foonds riech ziech op taboe- en stigma doorbreking en wetensjappelek oonderzeuk vaan de aofdeiling Neurologie, Psychiatrie & neuropsychologie vaan ’t Mestreechs UMC+

D’n Taolkelender is mesjiens we e leuk Sinterklaoskedo dit jaor. Ein exemplaar kos € 18,00. Geer kint d’n taolkelender vaan ’t Mestreechs noe al bestèlle door e mailke te sjikke nao Paula Snijders vaan ’t Jonge brein onderzoeksfonds Limburg. Vermel ezzebleef eure naom en achternaom, ’t aontal exemplare, ’t aoflieveradres en eur tèllefoonnómmer.

← Ga terug