Nuuj bouk van John Hertogh oet Zitterd

De dialeksjriever en -dichter John Hertogh (oud Zwentibolddichter) haet op ziene 75e verjäördaag (8 meert) zien viefde buikske: EINE POES BLOUME in t Zittesj gepubliceierd. Mit verhaole en gedichter, alles in zien geleif Zittesj..

Mit ein pitsjuigske

Waat betruf d’n tittel sjrif hae: “Zuug ’t wie eine poes bloume, geplök in ’t veldj en wei; sommige zeen gans frisj, angere al get versjlak… mit anger weurd nuje en awwere gedichter en verhaole”. Op de achterkaf sjteit ó.a.: “Soms ontroerend, mer meistes mit ein pitsjuigske, nump hae uch mit nao ein welt die gans herkènbaar is”.

De prachtige kaf en teikeninge zeen gemaak door Jan Ruigt oet Zitterd. ’t Bouk (165 pagina’s A5) lik al vanaaf 8 meert in de bouk-hanjel van Wim Krings oppe Brandjsjtraot in Zitterd. De pries is €12,50 , toch neit te duur veur ein sjtökske Zittesje kultuur!

Presentatie op Sint Joep

De offisjieel presentatie wurt gehawte op Sint Joep, 19 meert, in ’t Mariapark op de Awwe Mert in Zitterd. Dao sjteit ouch Veldeke Krènk Zitterd de gansen daag. Naeve anger oetgaaf kènt geer ’t bouk ouch dao aansjaffe. Es geer dat tösje 14:00 oer en 16:30 oer doot, krig van de sjriever zelf, es geer dat wilt, ein perseunlik weurdje gesjreve in eur aangesjaf exemplaar!