Nuut bouk in ’t Zittesj van de dichter/sjriever John Hertogh.

Op vriedig 3 juni a.s. presenteiert Veldeke Krènk Zitterd häör nuutste oetgaaf: de bundel “Van Oukouk pès Cötelbaek”, 24 sjtökskes in en euver ós modesjtaal, door John Hertogh.

De Zwentibolddichter(2018-2022) John Hertogh, sjrif al gans get jaore naeve zien Zittesje gedichter en korte verhaole ouch columns/rubrieke ónger de kop “van Kul pès Kultuur”. Die waere gelaeze door ‘ne grote gróp geïntres-seierde laezesj.

Hae sjrif ouch maonjeliks de rubriek “Os Modesjtaal” in de VIA van De Limburger. Ómdat neit jederein die gezèt in de breivebös krig, zeen 24 sjtökskes, mit biepassende foto’s, noe gebundeld in dit bouk. Aangezeen ’t eesjte sjtökske euver ’t sjuumke trèkke mit oukouk geit en ’t lèste euver ’t park en de Cötelbaek, waar de titel gaw gevónje!

De presentatie van de bundel, en petit comité, wurt georganiseierd door Veldeke Krènk Zitterd. Hiebie zal taeves Cyrille Niël aanwezig zeen, ónger angere es groot bewónjeraer van Toon Hermans, de sjriever van ’t leidje Oukouk. Van Oukouk pès Cötelbaek is vanaaf zaoterdig 4 juni te koup in de boukhanjel van Wim Krings.

← Ga terug