Oetnuuediging: Limburgse finale declamatiewedstried
De provinciale finale van de Veldeke Declamatiewedstried zal dit jaor gehaoje waere in MFC ‘t Patronaat in Sint Joas op zaoterdagmiddag 24 mei a.s. vanaaf 13.30 oer. Ederein is daobie van herte oetgenuuedigd! Prissentasie van de ganse middig is in henj van Rob Mennen.
Deilnömmers
Ein finale in Sint Joas: det beteikentj väör de finaliste van Veldeke Krink Ech bienao ‘ne thoeswedstried. Naeve de 11 kinjer oet Ech en Zöstere zólle nog 12 deilnummers oet Venlo, Tegele en Wieërt mitdoon. Al dees kinjer zeen bie de eerder gehaoje väörrundjes geselecteerdj väör deilname aan de Limburgse finale. ’n Speciaal samegestèldje jury zal den bekieke waem daobie ’t bèst nao väöre kömtj en waem zich ’t kómmendje jaor “Limburgs Kampioen” moge neume.
Väörrundjes
De kinjer waere tiejes deze middig ingedeildj in 3 laeftiedscategorieë. De te declamere gedichte zeen dus gans aangepasj aan de interesses van ‘t kindj, zoawaal waat de lèngdje betruftj es de inhawd. En det beteikendj det ’t pebliek dök getrakteerd weurtj op waor toneelstukskes. Det maak ’t väör de viefköppige jury neet gemaekeliker. Gelökkig geldj ouch hie det mitdoon väöl belangrieker is den winne: det de kènjer ’t dialek actief op ’t podium gebroeke is ömmers al ein hieël groat compliment waerd.
De res van de middig
Tiejes ’t juryberaod zal Goud Verteltheater ’t pebliek weite te boeie mit häör fantastische vertèlkunste – in ’t dialek uiteraard. Omstreeks 16.45 oer weurtj de middig aafgeslaote mit de priesoetreiking en een waalverdeendj applaus väör alle deilnömmers.
Äöver de Declamatiewedstried
Veldeke Limburg organiseertj al mieë es 20 jaor de declamatiewedstried óm de Limburgse taal bie de jeug ónger de aandach te brènge. Dit jaor doon w’r det in samewèrking mit Veldeke Krink Ech. Mit de wedstried haope w’r de kènjer te inspirere om de Limburgse taal te blieve gebroeke en in standj te haoje. Per laeftiedscategorie waere door Veldeke gedichte aangebaoje, wo-oet de kinjer eine kènne keze went zie wille mitdoon aan de wedstried. Sommige deilnummers inspireertj ’t ouch óm zelf of same mit pap, mam, opa of oma ’n gedich te gaon sjrieve. Veldeke Limburg wènsj al die enthousiastelinge väöl succes en väöral hieël väöl plezeer. En weer zeen uch gaer in Sint Joas a.s. zaoterdig 24 mei!
